PDK akuzon RTK-në për shtrembërim të qëllimshëm të qëndrimit për krerët e UÇK-së

Partia Demokratike e Kosovës ka reaguar ashpër ndaj një kronike të transmetuar në edicionin qendror të lajmeve të Radio Televizionit të Kosovës. Sipas kësaj partie, raportimi në fjalë ka paraqitur në mënyrë të pasaktë qëndrimin e saj, duke pretenduar rrejshëm se PDK kërkon “uljen e dënimeve për krerët e UÇK-së”. Në një deklaratë për media, PDK-ja e ka vlerësuar këtë formulim si tendencioz dhe fyes, duke theksuar se pozicioni i tyre zyrtar është shtrembëruar me qëllim. “PDK e ka kundërshtuar aktgjykimin e shkallës së parë dhe kërkon lirimin e plotë të çlirimtarëve”, thuhet në reagimin e kësaj partie. Sipas subjektit opozitar, angazhimi i tyre është i përqendruar në kërkimin e drejtësisë dhe sigurimin e mbështetjes maksimale shtetërore për ish-krerët e UÇK-së gjatë procesit të apelit. PDK-ja ka potencuar se edhe nisma e saj ligjore për ndryshimin e Ligjit për Dhomat e Specializuara synon pikërisht garantimin e këtyre të drejtave. “Nuk pranojmë që kërkesa jonë për drejtësi dhe lirim të plotë të paraqitet para publikut si kërkesë për ulje dënimesh”, vazhdon reagimi, duke shprehur njëkohësisht shqetësimin për politikën redaksionale të transmetuesit publik, e cila, sipas tyre, krijon përshtypjen e një raportimi me prapavijë politike. Në përfundim, Partia Demokratike e Kosovës ka kërkuar nga RTK-ja që të ndërmarrë hapat e nevojshëm për korrigjimin e kronikës, sqarimin e saktë të qëndrimit të partisë dhe kërkimin e një faljeje publike për dezinformimin e shkaktuar.