Vrasja e Arlinda Zekajt, Lëvizja Vetëvendosje: Shoqëria nuk duhet të gjunjëzohet përballë dhunës dhe vrasësve

Lëvizja Vetëvendosje ka reaguar ashpër pas tragjedisë së fundit në Pejë, ku Arlinda Zekaj mbeti viktimë e një vrasjeje. Përmes një komunikate për media, kjo parti ka shprehur ngushëllimet më të thella për familjen e viktimës, duke e cilësuar humbjen si një goditje të rëndë për shoqërinë, pasi një grua humbi jetën nga dhuna e një familjari, ndërsa një 12-vjeçar mbeti jetim. Sipas të dhënave të publikuara nga kjo parti, që nga fillimi i vitit në Kosovë janë shënuar 17 vrasje, ku tetë prej viktimave janë gra dhe nëntë burra. Lëvizja Vetëvendosje nënvizon se vrasjet e grave bartin një dimension të veçantë shoqëror, pasi shpesh janë rezultat i mentalitetit patriarkal, përpjekjeve për kontroll mbi gruan dhe mohimit të lirisë së saj themelore, duke e vlerësuar këtë dukuri si një formë të femicidit në vendin tonë. Lidhur me vrasjet e burrave dhe djemve, partia në pushtet vlerëson se ato janë tregues të një kulture të rrezikshme të forcës, hakmarrjes dhe zgjidhjes së konflikteve përmes armëve. Këto fenomene, sipas tyre, janë pasojë e drejtpërdrejtë e një historie të gjatë të pandëshkueshmërisë dhe ndikimit të kulturës së “të fortit” që ka rrënjë në dy dekadat e shkuara. Institucionet përgjegjëse, përfshirë policinë, prokurorinë, gjykatat, komunat dhe qendrat për punë sociale, janë thirrur të veprojnë me efikasitet më të lartë. Vetëvendosje kërkon që këto organe të jenë plotësisht të pavarura nga paragjykimet apo mentaliteti patriarkal, duke u fokusuar në parandalimin e dhunës, mbrojtjen e viktimave dhe ndëshkimin e merituar të autorëve, pasi çdo kërcënim i neglizhuar rrezikon të shndërrohet në një tragjedi të re. Në mesazhin e saj, Lëvizja Vetëvendosje thekson se mbrojtja e jetës kërkon një angazhim gjithëpërfshirës që përfshin drejtësinë sociale dhe zhvillimin ekonomik. Partia siguron se do të vazhdojë përpjekjet për fuqizimin ekonomik të familjeve, ndërsa mesazhi i tyre përfundimtar mbetet i prerë: shoqëria nuk duhet të lejojë që frika të shndërrohet në mënyrë jetese, e as të dorëzohet përballë vrasësve dhe kulturës që tenton t'i arsyetojë ata.