Zvicra propozon gjashtë masa të reja për frenimin e kostove të shëndetësisë

Siguruesit shëndetësorë, spitalet dhe autoritetet zvicerane kanë rënë dakord për gjashtë masa të reja që synojnë frenimin e kostove të kujdesit shëndetësor, të cilat pritet të zbatohen deri në vitin 2027. Vendimi u bë i ditur të hënën nga ministrja zvicerane e Shëndetësisë, Elisabeth Baume-Schneider, pas takimit të pestë të tryezës së rrumbullakët, të mbajtur në Bernë. Nisma synon të përballet me rritjen e vazhdueshme të shpenzimeve shëndetësore, në një kohë kur qytetarët zviceranë po përballen edhe me rritjen e primeve të sigurimit shëndetësor, raporton Swissinfo. Gjashtë masa për uljen e shpenzimeve Masat e reja përfshijnë rritjen e transparencës së çmimeve të pajisjeve mjekësore dhe nxitjen e trajtimit ambulator, i cili zakonisht është më pak i kushtueshëm sesa trajtimi me qëndrim në spital. Po ashtu, dy organizata do të vlerësojnë tarifat e shërbimeve ambulatore në shkallë të gjerë dhe përgjatë një periudhe të caktuar. Kjo do t’u mundësojë kantoneve të monitorojnë ndryshimet e çmimeve gjatë kalimit nga trajtimi spitalor në atë ambulator. Ministrja Baume-Schneider i cilësoi këto masa si pragmatike, duke theksuar se ato nuk rrezikojnë sigurinë e pacientëve apo cilësinë e shërbimeve shëndetësore. Sipas Departamentit Federal të Punëve të Brendshme, masat e tjera përfshijnë lehtësimin e ngarkesës në repartet e urgjencës, zhvillimin e programeve të kujdesit për personat me sëmundje kronike, koordinimin e furnizimit me barna për shtëpitë e të moshuarve dhe nxitjen e trajtimeve që mund të kryhen në shtëpi, transmeton Telegrafi. Kursimet ende nuk janë përcaktuar Pjesëmarrësit e takimit janë pajtuar që të gjashtë masat të zbatohen deri në vitin 2027. Disa prej tyre përfshijnë edhe propozime të paraqitura nga qytetarët përmes një platforme elektronike. Megjithatë, ndikimi financiar i masave të reja ende nuk është llogaritur. Përfaqësuesja e kantonit Jura ka vlerësuar se, nëse zbatohen me sukses, ato mund të sjellin kursime më të mëdha sesa ato që ishin parashikuar nga paketa e parë. Në takimet e mëparshme, palët kishin miratuar një paketë prej 12 masash për frenimin e kostove të shëndetësisë. Gjatë diskutimeve të fundit u trajtua edhe çështja e pagave të mjekëve specialistë, por për këtë temë nuk u arrit pajtim mes pjesëmarrësve. Baume-Schneider theksoi se palët vendosën të përqendrohen në fushat ku ekziston konsensus, në vend që të vazhdonin diskutimet pa arritur rezultate konkrete. Ajo rikujtoi se tryeza e rrumbullakët nuk merr vendime detyruese dhe se zbatimi i masave duhet të ndiqet përmes procedurave përkatëse parlamentare.