Mexhiti paralajmëron shkarkime: Kushdo që shkel Ligjin për përfaqësim të drejtë do të mbajë përgjegjësi

Bashkëkryetari i koalicionit VLEN, Izet Mexhiti, ka dërguar një mesazh të qartë për të gjithë funksionarët publikë: moszbatimi i Ligjit për përfaqësim të drejtë dhe adekuat do të pasohet me masa konkrete disiplinore, duke përfshirë edhe shkarkimin nga detyra. Në një intervistë për emisionin “Debat në Shenja”, Mexhiti nënvizoi se respektimi i këtij ligji është shtylla kryesore e Marrëveshjes së Ohrit, Kushtetutës dhe agjendës qeveritare. Sipas tij, toleranca ndaj shkeljeve ligjore në këtë drejtim do të jetë zero. “Do të ketë përgjegjësi politike. Kjo sjellje nuk përkon me frymën e Marrëveshjes së Ohrit, as me Kushtetutën dhe as me politikat e kësaj Qeverie. Kushdo që nuk e respekton ligjin, do të shkarkohet. Për shembull, ashtu siç mund të shkarkohet kryetari i Kuvendit nëse dështon në zbatimin e këtij ligji, i njëjti standard vlen edhe për Presidentin, i cili ka për detyrë të mbrojë ligjshmërinë dhe jo ta shkelë atë”, u shpreh Mexhiti. Ai shtoi se qëllimshmëria në shkeljen e dispozitave ligjore ndryshon rrënjësisht natyrën e përgjegjësisë. Mexhiti theksoi se kur zyrtarët janë të vetëdijshëm për veprimet e tyre dhe zgjedhin të shkelin ligjin, ata duhet të jenë të përgatitur për të përballuar pasojat e rënda, si ato juridike, ashtu edhe ato politike.