Kthehet moti i ftohtë: Nga nesër reshje shiu dhe borë në zonat malore

Vendi ynë do të përfshihet nga një ndryshim i dukshëm i kushteve atmosferike duke filluar nga dita e nesërme, ndërsa meteorologët paralajmërojnë ulje të temperaturave dhe reshje shiu e dëbore. Sipas parashikimeve, moti do të karakterizohet nga vranësira dhe freski, me reshje shiu që në fazën e parë do të përfshijnë rajonet veriore, për t'u shndërruar më pas në reshje dëbore në majat e larta malore. Përveç reshjeve, situata do të shoqërohet edhe me erëra nga drejtimi verior, të cilat herë pas here do të jenë mesatare deri të fuqishme, duke kaluar shpejtësinë prej 60 kilometrash në orë. Sa i përket vlerave termike, termometret do të shënojnë ulje. Temperaturat minimale do të lëvizin nga -2 deri në 8 gradë Celsius, ndërsa ato maksimale gjatë ditës do të arrijnë ndërmjet 9 dhe 17 gradë Celsius. Ndryshimet e motit do të ndihen edhe në kryeqytet. Në Shkup pritet mot i ndryshueshëm, me vranësira dhe më i freskët, shoqëruar me mundësi për reshje shiu dhe erëra mesatare veriore. Temperatura minimale në qytet do të zbresë në 5 gradë Celsius, kurse ajo maksimale do arijë deri në 13 gradë Celsius, sipas të dhënave zyrtare nga Drejtoria për Punë Hidrometeorologjike. Autoritetet kompetente bëjnë me dije se ky mot i paqëndrueshëm me vranësira do të shtrihet në të gjithë territorin, duke sjellë rikthimin e kushteve dimërore sidomos në viset malore.