Tragjedia e Arlindës, ministri Sveçla kërkon hetim parlamentar dhe llogaridhënie për të gjitha institucionet

Ministri i Punëve të Brendshme, Xhelal Sveçla, ka bërë të ditur se i është drejtuar Kuvendit me një kërkesë zyrtare për themelimin e një komisioni hetimor parlamentar, me qëllim shqyrtimin e detajuar të reagimeve dhe lëshimeve të institucioneve shtetërore në lidhje me rastin e Arlinda Zekajt. Gjatë fjalës së tij në foltoren e Kuvendit, Sveçla njoftoi se menjëherë sapo është njohur me ngjarjen, ka kërkuar nga Inspektorati Policor i Kosovës (IPK) nisjen e hetimeve për të vlerësuar sjelljen dhe çdo veprim apo mosveprim të mundshëm të zyrtarëve policorë. Megjithatë, kreu i ministrisë së Brendshme ka vënë theksin te fakti se përgjegjësia institucionale nuk mund të kufizohet vetëm te policia, por duhet të shtrihet në të gjithë mekanizmin shtetëror që ka qenë i kyçur në këtë zinxhir. “Por pyetja tjetër që ka lindur është: Çka me institucionet e tjera? Me Prokurorinë, me Gjykatën, me Qendrën për Punë Sociale, e cila është në varësi të komunës, me Mbrojtësin e Viktimave, me vetë IPK-në”, ka deklaruar Sveçla. Duke theksuar se çdo hallkë e sistemit mban përgjegjësinë e saj specifike, ministri shpjegoi se në mungesë të instrumenteve të tjera adekuate për të kërkuar përgjegjësi, ka zgjedhur t'i drejtohet organit legjislativ për ngritjen e komisionit hetimor. “Kam kërkuar nga Parlamenti që të bëjë komision hetimor parlamentar në mënyrë që të gjitha institucionet të vijnë para jush në komision dhe të japin llogaridhënie për veprimet apo mosveprimet e tyre”, tha ministri.