Gjest i fortë i futbollistëve irlandezë: Bojkotojnë shtrëngimin e duarve dhe ulin kokën gjatë himnit të Izraelit

Përballja mes Irlandës dhe Izraelit ka shkaktuar bujë të madhe në arenën ndërkombëtare, veçanërisht për shkak të tensioneve që shoqëruan ceremoninë hapëse të ndeshjes. Ndonëse kishte spekulime të shumta nëse përfaqësuesja irlandeze do të pranonte të zbriste në fushë, Federata e Futbollit të Irlandës vendosi të konfirmojë pjesëmarrjen në këtë takim. Megjithatë, futbollistët irlandezë shfrytëzuan këtë moment për të shprehur qëndrimin e tyre politik. Gjatë intonimit të himnit shtetëror të Izraelit, lojtarët e Irlandës zgjodhën të ulnin kokat në shenjë revolte ndaj shtetit izraelit dhe situatës së tensionuar gjeopolitike. Një tjetër skenë e pazakontë u shënua gjatë protokollit zyrtar para fillimit të lojës. Futbollistët e të dyja skuadrave shmangën plotësisht shtrëngimin tradicional të duarve, duke u drejtuar menjëherë nga bankinat e tyre, një veprim që pasqyron qartë klimën e rënduar mes dy vendeve. Ky reagim vjen si pasojë e qëndrimit të prerë të Irlandës kundër veprimeve ushtarake të Izraelit në Gaza. Shteti irlandez ka qenë vazhdimisht zëri më kritik ndaj viktimave civile në Palestinë, duke përfshirë gra, fëmijë e të moshuar, ndërsa zyrtarisht vazhdon të mbrojë me ngulm çështjen dhe shtetësinë palestineze në arenën diplomatike.