Vojvoda pas disfatës ndaj Austrisë: Duhet ta lëmë këtë ndeshje pas krahëve dhe të synojmë majën

Mbrojtësi i kombëtares së Kosovës, Mërgim Vojvoda, ka analizuar humbjen e pësuar përballë Austrisë, duke pranuar se skuadra i la tepër hapësira kundërshtarit për të zhvilluar kundërsulme të rrezikshme. Sipas futbollistit, “Dardanët” patën mundësinë e artë për të kaluar të parët në epërsi dhe për ta orientuar ndeshjen në favor të tyre, mirëpo ky shans mbeti i pashfrytëzuar. Duke folur për sfidën e radhës, Vojvoda theksoi se ekipi duhet të kthejë menjëherë faqen dhe të fokusohet te triumfi në duelin e ardhshëm. “Besoj që plani nuk ishte i keq, ka munguar pak energji sepse luajtëm para tre ditëve, gabuam ku nuk duhet. Patëm edhe një rast kryesor para se të pranonim dy golat, ajo mund të ishte çelësi i lojës, pritshmëritë i kemi pasur shumë të mëdha, ka munguar pak freski dhe aty ishte problemi. Kur i pranon tre gola nuk mund të thuash se je i kënaqur, jo vetëm mbrojtja por krejt ekipi, i kemi lënë Austrisë hapësirë për kundërsulme. Duhet të harrohet kjo humbje dhe duhet të shkojmë për fitore ndaj Izraelit dhe ka shumë rëndësi çdo lojë dhe presim vendin e parë në këtë grup”, u shpreh Vojvoda.