Tragjedia në Pejë nxit revoltim: Të mërkurën mbahet protesta për Arlinda Zekajn dhe sigurinë e grave

Pas vrasjes së Arlinda Zekajt në qytetin e Pejës, shoqëria civile ka ngritur alarmin dhe ka thirrur një protestë masive. Tubimi do të zhvillohet këtë të mërkurë, duke filluar nga ora 16:00, në sheshin “Zahir Pajaziti” në Prishtinë, nën moton “Vrasja e grave të trajtohet si urgjencë kombëtare”. Nëpërmjet një njoftimi zyrtar për media, organizatorët kanë bërë thirrje për një mobilizim gjithëpërfshirës qytetar dhe kërkojnë llogaridhënie të drejtpërdrejtë nga strukturat shtetërore. Sipas tyre, ngjarja e rëndë është dëshmi e qartë e heshtjes dhe neglizhencës institucionale ndaj thirrjeve të vazhdueshme të grave për jetë dhe siguri. “Nuk mund të vazhdojmë të jetojmë një normalitet të sforcuar kur gratë po dhunohen, rrahen e edhe vriten para syve tanë”, theksohet në kumtesën e shpërndarë për publikun. Revolta qytetare nuk do të ndalet vetëm me tubimin e së mërkurës. Organizatorët kanë paralajmëruar se gjatë ditëve në vijim, përfshirë të enjten dhe të premten, do të ketë aksione të tjera protestuese dhe bllokime të institucioneve përgjegjëse. Sipas planit të marshit, protestuesit do të nisen nga sheshi “Zahir Pajaziti” dhe do të drejtohen fillimisht para Ministrisë së Drejtësisë. Itinerari i protestës parasheh ndalesa edhe pranë Këshillit Prokurorial, Këshillit Gjyqësor, Policisë së Kosovës, si dhe ndërtesës së Qeverisë. “Kërkojmë organizim e solidarizim kombëtar. Për siguri e liri për gratë e gjalla, e drejtësi për gratë e vrara. Na u bashkoni!”, përfundon thirrja drejtuar qytetarëve.