Tragjedia në Pejë vë në lëvizje Kuvendin: Sot mbahet seanca e jashtëzakonshme për dhunën ndaj grave

Kuvendi i Kosovës do mblidhet sot pasdite në një seancë të jashtëzakonshme plenare, e cila vjen si reagim ndaj ngjarjeve të rënda kriminale në vend. Mbledhja është caktuar të nisë në orën 16:00 në sallën e Kuvendit. Në qendër të vëmendjes së këtij diskutimi urgjent do të jetë vrasja e fundit e regjistruar në fshatin Vitomiricë të Pejës, ku viktimë mbeti Arlinda Zekaj. Përveç këtij rasti tragjik, rendi i ditës parasheh trajtimin e dukurisë shqetësuese të vrasjeve të grave, dhunës në familje ndaj grave dhe fëmijëve, si dhe llogaridhënien institucionale. Po ashtu, deputetët do të diskutojnë mbi mekanizmat e parandalimit të dhunës me bazë gjinore dhe garantimin e mbrojtjes për jetën e grave. Në njoftimin zyrtar të shpërndarë për media, pika e vetme e rendit të ditës është përcaktuar qartë: “Vrasja e fundit në Vitomiricë të Pejës, rastet tjera të vrasjes së grave, dhuna në familje ndaj grave dhe fëmijëve, përgjegjësia institucionale, parandalimi i dhunës në baza gjinore dhe mbrojta e jetës së grave”.