Nuk siguroi mandat në parlamentin serb, mesazhi prekës i Amina Nurajt për shqiptarët

Amina Nuraj ka thyer heshtjen pas përfundimit të zgjedhjeve në Serbi, ku nuk ka arritur të sigurojë një ulëse në Kuvend, duke iu drejtuar opinionit publik me një falënderim të përzemërt për mbështetjen e madhe dhe mesazhet e shumta që ka pranuar gjatë kësaj periudhe. Nëpërmjet një deklarate të bërë publike në rrjetet sociale, ajo ka sqaruar se pjesëmarrja e saj në garën zgjedhore nuk ka qenë e motivuar nga ambiciet personale, por nga dëshira e sinqertë për t'i dhënë zë interesave të shqiptarëve. Nuraj ka shfaqur gëzimin e saj për suksesin e arritur nga përfaqësuesit e tjerë shqiptarë që siguruan mandate, duke nënvizuar se, pavarësisht rezultatit personal, përkushtimi i saj ndaj kauzës kombëtare do të mbetet i palëkundur. "Të dashur vëllezër dhe motra shqiptare! Shumë mesazhe më kanë ardhur nga bashkatdhetarët e mi, të cilët janë të mërzitur që nuk u zgjodha deputete", ka shkruar ajo në mesazhin e saj. "Por dua t’ju them diçka: unë në këtë fushatë nuk kontribuova për veten, por për kombin tim shqiptar! Edhe sikur të gjitha motrat dhe vëllezërit e mi nga lista të zgjidheshin deputetë, e unë jo, përsëri do të isha e lumtur dhe krenare!", ka shtuar tutje ajo. Duke vënë theksin te rëndësia e përfaqësimit, ajo u shpreh se triumfi i më shumë se një ulëseje për shqiptarët e ka mbushur me gëzim zemrën, pasi synimi kryesor mbetet fuqizimi i zërit tonë. Në mbyllje të reagimit të saj, Nuraj ka shprehur mirënjohjen e thellë për mbështetjen dhe fjalët e ngrohta, duke garantuar se mungesa e saj në Kuvend nuk do ta ndalë kurrë aktivitetin dhe betejën e saj në shërbim të kombit.