Nata e madhe e futbollit: Sonte në Londër zbulohet fituesi i “Topit të Artë”

Bota e futbollit sytë i ka drejtuar nga Anglia, ku mbrëmjen e sotme do të mbahet ceremonia e 70-të e ndarjes së çmimeve “Topi i Artë”. Ky edicion shënon një kthesë historike, pasi për herë të parë ngjarja më prestigjioze e ndarjes së çmimeve individuale largohet nga Parisi. Evenimenti i madh do të nisë në orën 21:00 në ambientet e teatrit “London Palladium”, ndërkohë që dyert për të ftuarit do të hapen duke filluar nga ora 19:00. Prezantimi i kësaj nate gala do t'i besohet dyshes së njohur, Thierry Henry dhe Kate Scott. Në garën për trofeun e lakmuar të lojtarit më të mirë në planet, emra si Harry Kane dhe Lamine Yamal përfliten si pretendentët kryesorë, ndërsa Kylian Mbappe mbetet po ashtu një forcë e madhe në këtë luftë për lavdi. Revista prestigjioze “France Football” ka përzgjedhur 30 futbollistë në listën e ngushtë, ku spikasin figura të shquara si Lionel Messi, Erling Haaland, Ousmane Dembele dhe Vinicius Junior. Konkurrenca paralajmërohet tepër e fortë, duke marrë parasysh paraqitjet e jashtëzakonshme të lojtarëve me fanellat e klubeve dhe kombëtareve të tyre, ku krahas pretendentëve kryesorë përfshihen edhe Rodri, Fabian Ruiz e Khvicha Kvaratskhelia. Përveç tyre, lista e plotë e kandidatëve përmban emrat e Jude Bellingham, Pau Cubarsi, Marc Cucurella, Luis Diaz, Bruno Fernandes, Gabriel Magalhaes, Achraf Hakimi, Sadio Mane, Marquinhos, Lautaro Martínez, Nuno Mendes, Joao Neves, Michael Olise, Willian Pacho, Julián Quinones, Declan Rice, Rodri Hernandez, Ferran Torres, William Saliba, Dayot Upamecano dhe Vitinha. Kriter vlerësimi për këtë edicion 2025/26 janë paraqitjet individuale përgjatë gjithë sezonit, duke përfshirë edhe sfidat e Kupës së Botës. Fituesi përzgjidhet përmes votave të një jurie prej gazetarësh specialistë nga vende të ndryshme të botës, të caktuar sipas kritereve të FIFA-s. Çdo anëtar i jurisë zgjedh dhjetë lojtarë, të cilëve u ndan pikë nga 1 deri në 15, dhe ai që grumbullon totalin më të lartë shpallet triumfues. Përveç çmimit kryesor për futbollistin dhe futbollisten më të mirë, mbrëmja do të rezervojë edhe shpërblime të tjera të rëndësishme për arritjet individuale dhe kolektive. Në fokus do të jenë Trofeu “Kopa” për talentin më të ri, çmimi “Yashin” për portierin e dalluar, si dhe trofeu “Gerd Muller” dedikuar golashënuesve më të mirë të sezoneve. Puna e trajnerëve do të vlerësohet përmes çmimit “Johan Cruyff”, kurse angazhimi qytetar e humanitar do të nderohet me trofeun “Sócrates”. Në garën për klubin më të mirë të vitit për meshkuj janë nominuar skuadrat e njohura si Paris Saint-Germain, Arsenali, Bayern Munich, Bodø/Glimt dhe Flamengo, duke i dhënë edhe më shumë peshë këtij organizimi madhështor në kryeqytetin britanik.