Sekretet e sherbelës: Si ta përdorni dhe ta kombinoni këtë bimë magjike në gatimet tuaja

Për të shijuar në maksimum aromën dhe shijen e veçantë të sherbelës, ekspertët sugjerojnë të ndiqni dy rregulla shumë të thjeshta. Së pari, momenti i vjeljes luan një rol kyç; kjo bimë është më e shijshme në periudhën pak para se të nisë lulëzimi. Megjithatë, edhe nëse e mblidhni në një kohë tjetër, truku i dytë që bën diferencën është mënyra e përgatitjes. Sipas Qendrës Federale Gjermane për Ushqyerjen (BZfE), sherbela e lëshon plotësisht aromën e saj vetëm atëherë kur nxehet lehtë gjatë gatimit. Por cilat janë kombinimet ideale për këtë bimë? Një bashkim fantastik është ai i sherbelës me gjalpin, i cili shkon në mënyrë të përsosur me makarona, mish shpendësh apo peshk. Mjafton të përzieni gjethet e grira imët të sherbelës në gjalpin e shkrirë dhe në fund të shtoni piper sipas shijes. Me aromën e saj pikante dhe të athët, ajo i dhuron pjatës një freski unike të ngjashme me eukaliptin mesdhetar. Gjithashtu, sherbela mund të kombinohet shkëlqyeshëm me hudhrën ose me erëza të tjera të forta si estragoni dhe trumza. Falë vajrave esencialë që përmban, kjo bimë medicinale ndihmon në tretjen më të lehtë të ushqimit. Kjo është arsyeja pse ajo përdoret tradicionalisht në pjatat me mish të pasur me yndyrë, siç është receta e njohur italiane Saltimbocca alla romana – një eskalop viçi i mbushur me proshutë dhe sherebelë. Përveçse e shijshme, sherbela është edhe jashtëzakonisht e shëndetshme. Përdorimi i saj në formë çaji mund të qetësojë dhimbjet e fytit apo vështirësitë në gëlltitje, ndërsa përdoret gjerësisht edhe për lehtësimin e dhimbjeve të dhëmbëve dhe problemeve gastrointestinale. Megjithatë, BZfE paralajmëron se nuk duhet të konsumohet në sasi të mëdha ose për një periudhë të gjatë kohore, pasi bima përmban vajin esencial të njohur si tujon, i cili mund të rezultojë i dëmshëm në doza të larta. Kujdes i shtuar rekomandohet sidomos për gratë shtatzëna. Sa i përket ruajtjes, sherbela mund të përdoret si e freskët ashtu edhe e tharë. E tharë, ajo ruan cilësitë e saj për disa muaj nëse mbahet në një ambient të freskët, të errët dhe në enë hermetike. Nëse e blini të freskët në tufa, jetëgjatësinë e saj mund ta shtoni duke e vendosur në një gotë me ujë të pastër, ose duke e mbështjellë me një pecetë kuzhine të lagur dhe vendosur në sirtarin e perimeve në frigorifer për disa ditë. Në rast se blini një vazo të vogël me sherbelë të freskët në dyqan, ekspertët e BZfE këshillojnë të kontrolloni që skajet e gjetheve dhe majat e lastarëve të mos jenë të thata, si dhe bima të ketë një aromë të këndshme. Sezoni optimal i rritjes ndryshon sipas zonave; për shembull, në Itali ai shtrihet nga fundi i pranverës deri në fillim të verës, ndërsa aroma dhe shija më e fortë arrihet zakonisht nga prilli deri në korrik. Për më tepër, ju mund ta kultivoni shumë lehtë sherbelën edhe vetë në kopsht apo në ballkon, mjafton të keni një hapësirë me diell.