Kufizimi i mandateve në politikë, aktivisti Dritan Goxhaj nga protesta në Tiranë: Të ndryshojë ligji për kryeministrin dhe deputetët

Gjatë tubimit të radhës, i cili shënoi plot 120 ditë protestash të njëpasnjëshme në kryeqytet kundër qeverisë së kryeministrit Edi Rama, aktivisti i njohur Dritan Goxhaj ka ngritur shqetësimin për nevojën e ndryshimeve rrënjësore ligjore në vend. Ai ka propozuar vendosjen e një kufiri të prerë prej dy mandatesh gjatë gjithë karrierës politike për këdo që mban postin e kreut të ekzekutivit. Sipas Goxhait, rivendosja e standardeve demokratike në Shqipëri kërkon domosdoshmërisht që kufizime të ngjashme të aplikohen edhe për deputetët në Kuvend, duke frenuar kështu pushtetin e pakufizuar të përfaqësuesve të qytetarëve. Duke iu drejtuar qytetarëve të pranishëm, ai theksoi rëndësinë e kalimit nga kritika ndaj sistemit aktual te vizioni për të ardhmen. "Sot bëjmë 120 ditë sakrificë, kemi folur për atë që nuk duam, për korrupsionin që na ka grabitur, nepotizmin që na ka mbajtur peng, për tradhtinë e binomit Rama-Berisha që na futu në këtë moçal. Kemi folur për Shqipërinë që nuk duam, por duhet të flasim dhe për Shqipërinë që duam", u shpreh ai. Më tej, Goxhaj detajoi vizionin e tij për institucionet e vendit, duke kërkuar një shtet ku kryeministri të mos kalojë dy mandate në karrierë, ku asnjë zyrtar apo deputet të mos qëndrojë në detyrë më gjatë se kreu i shtetit, si dhe një polici e cila të jetë e pavarur dhe të mos shërbejë si instrument i krimit apo i grupeve të caktuara.