Rikthimi i 'Trurit': Si po tenton Greqia t'i joshë profesionistët e larguar drejt Gjermanisë

Irini Kapogianni sot drejton një klinikë stomatologjike në Athinë, por rrugëtimin e saj profesional e nisi dhe e konsolidoi në Dyseldorf të Gjermanisë. Ajo kujton me nostalgji dhe ankth periudhën e mërgimit, kur së bashku me bashkatdhetarët e tjerë mblidheshin të dielave nëpër kafene për të lexuar lajmet nga vendlindja, me shpresën dhe pikëpyetjen e madhe nëse do të mund të ktheheshin ndonjëherë në shtëpi. Historia e Kapogiannit pasqyron fatin e qindra mijëra grekëve që braktisën vendin gjatë krizës së rëndë financiare. Sipas statistikave zyrtare të qeverisë greke, që nga viti 2010, mbi gjysmë milioni qytetarë kanë emigruar jashtë vendit, duke shënuar një goditje të rëndë dhe një humbje të madhe të fuqisë punëtore të kualifikuar për ekonominë helene. Gjermania ishte destinacioni kryesor për shumicën e tyre, përfshirë edhe stomatologen Kapogianni. Ajo e cilëson karrierën e saj në Dyseldorf si një sukses të jashtëzakonshëm që nuk e kishte imagjinuar kurrë. Megjithatë, malli për familjen dhe ngrohtësia e vendlindjes lanë gjurmë tek ajo, duke e bërë të mendohej për vite me radhë përpara se të merrte vendimin përfundimtar për t'u kthyer. Vendimi i saj u lehtësua ndjeshëm nga rimëkëmbja e fundit ekonomike e Greqisë. Sot, vendi po shënon një rritje ekonomike që tejkalon mesataren e Bashkimit Evropian, ndërkohë që shkalla e papunësisë ka pësuar rënie të dukshme. Ky përmirësim ka sjellë një kthesë historike në trendet migratore: në vitin 2024, për herë të parë, numri i grekëve që u larguan nga Gjermania ishte më i lartë se i atyre që emigruan drejt saj. Sipas Julia Reinold nga Instituti për Kërkimin e Tregut të Punës dhe Profesioneve (IAB) në Nuremberg, ky zhvillim është një sinjal i rëndësishëm i një trendi më të gjerë evropian. Ndryshimet demografike po krijojnë vakuume të mëdha në tregjet e punës në vendet e origjinës brenda BE-së, duke rritur nevojën për rikthimin e profesionistëve. Ky eksod i kthimit mund të krijojë vështirësi të reja për tregun gjerman të punës. Reinold bën të ditur se në fund të vitit të kaluar, në Gjermani jetonin rreth 350,000 grekë, duke përbërë një forcë tejet të rëndësishme punëtore. Të dhënat konfirmojnë se emigrimi i grekëve drejt Gjermanisë ka rënë ndjeshëm vitet e fundit. Ekspertja thekson se shumë prej tyre po planifikojnë ose po mendojnë seriozisht largimin. Përveç faktorëve personalë si klima dhe stili i jetesës, ndikim të madh kanë edhe pakënaqësitë me politikat gjermane, si taksat e larta dhe burokracia e tepërt. Në këtë kontekst, Athina zyrtare po ndërmerr hapa konkretë për të tërhequr mbrapsht 'trurin' e vendit. Përmes platformës dhe fushatave 'ReBrain Greece', qeveria po prezanton mundësi punësimi jashtë kufijve. Konstantinos Agrapidas, zyrtar i lartë në Ministrinë e Punës, ka bërë të ditur se së shpejti do të organizohet një aktivitet i tillë edhe në Gjermani. Si qendër e këtij organizimi është përzgjedhur Mynihu, një qytet ku jetojnë dhe punojnë rreth 8,500 deri në 9,000 specialistë grekë me arsim të lartë, kryesisht në sektorë kritikë si mjekësia, teknologjia e informacionit, siguria kibernetike dhe industria e prodhimit. Për to nxitur këtë proces, qeveria greke ofron lehtësime të konsiderueshme, përfshirë reduktimin e taksës mbi të ardhurat me 50% për një periudhë shtatëvjeçare. Po ashtu, janë thjeshtuar ndjeshëm procedurat për njohjen e diplomave dhe kualifikimeve të fituara jashtë vendit. Agrapidas vlerëson se kthesa tashmë ka filluar, duke pretenduar se rreth dy të tretat e emigrantëve të kohës së krizës janë rikthyer tashmë në atdhe. Megjithatë, këto pretendime ngjallin skeptizëm tek ekspertët. Ekonomisti Yiorgos Ioannidis nga Qendra për Planifikim dhe Kërkime Ekonomike (KEPE) i kundërshton këto shifra optimiste, duke vënë në udhë se struktura e ekonomisë greke, e cila mbështetet fort te turizmi, paraqet ende sfida të rëndësishme për integrimin e qëndrueshëm të kësaj fuqie punëtore të kualifikuar.