Zgjedhjet në Serbi: CeSID regjistron mbi 300 shkelje dhe parregullsi deri në mbylljen e vendvotimeve

Procesi zgjedhor në Serbi është përcjellë me një numër të lartë parregullsish. Qendra për Zgjedhje të Lira dhe Demokraci (CeSID) ka bërë të ditur se deri në orën 20:00, kur edhe u mbyllën dyert e qendrave të votimit, janë evidentuar mbi 300 raste të shkeljeve të ndryshme gjatë ditës së zgjedhjeve. Në bazë të të dhënave të bëra publike nga kjo qendër, në fokus të parregullsive kanë qenë sfidat me organizimin e votimit jashtë qendrave zyrtare. Po ashtu, gjatë kësaj dite janë regjistruar shkelje të procedurave të identifikimit, ku disa qytetarë kanë votuar pa paraqitur dokumentin e identifikimit. Raportet e CeSID-it vënë theksin edhe te dukuri të tjera shqetësuese, siç janë fotografimi i përsëritur i fletëvotimeve brenda kabinave, si dhe prania e votimit familjar apo në grupe, të cilat bien ndesh me rregullat e procesit zgjedhor.