Zgjedhjet e parakohshme në Serbi: Publikohen të dhënat e para zyrtare, kryeson forca e Vuçiqit

Komisioni Zgjedhor Republikan ka bërë publike shifrat e para nga zgjedhjet e parakohshme parlamentare në Serbi, ku paraprakisht lista e udhëhequr nga Aleksandar Vuçiq siguron 141 vende, ndërsa Lista Studentore renditet me 95 ulëse në një legjislaturë që numëron gjithsej 250 mandate. Këto të dhëna fillestare bazohen në numërimin e vetëm 203 vendvotimeve nga gjithsej 8.392 sosh, përkatësisht 2.04 për qind të procesit. Në këtë garë zgjedhore janë përfshirë 18 subjekte politike, ku bën pjesë edhe Koalicioni Shqiptar nga Lugina e Preshevës, i radhitur me numrin 17. Sipas matjeve të agjencive Ipsos dhe CeSID, shkalla e daljes në votime deri në orën 19:00 ka arritur në 67,6 për qind, duke shënuar një rritje të ndjeshme krahasuar me zgjedhjet e kaluara, ku pjesëmarrja në të njëjtën kohë kishte qenë 55,9 për qind. E drejta e votës u takonte gjithsej 6.45 milionë qytetarëve, ndërsa për t'u bërë pjesë e parlamentit, subjektet duhet të kalojnë pragun prej tre për qind, rregull ky që nuk vlen për listat e pakicave kombëtare. Ndërkohë, Qendra për Zgjedhje të Lira dhe Demokraci (CeSID) ka bërë të ditur se deri në orën 20:00 janë evidentuar mbi 300 njoftime për shkelje dhe parregullsi gjatë mbarëvajtjes së procesit zgjedhor. Në raportin e publikuar në faqen e saj zyrtare, kjo organizatë ka theksuar se shqetësimet kryesore lidhen me mangësi në organizimin e votimit jashtë qendrave zyrtare, raste të votimit pa dokumente identifikimi, si dhe dukuri të përsëritura të fotografimit të fletëvotimeve dhe votimit në grup apo atij familjar.