Kthehet te fitorja Dinamo, Ilir Daja zbulon planin taktik që mposhti kampionët e Egnatias

Pas dy humbjeve radhazi në Abissnet Superiore, Dinamo ka regjistruar një triumf shumë të rëndësishëm në “Elbasan Arena”, duke mposhtur 2-1 skuadrën e Egnatias në kuadër të javës së 8-të. Një sukses ky që rikthen qetësinë në kampin blu dhe e ngjit sërish ekipin në pjesën e sipërme të renditjes. Pas përfundimit të ndeshjes, trajneri i Dinamos, Ilir Daja, ka analizuar 90 minutat e luajtura dhe nuk i ka kursyer elozhet për kundërshtarin dhe arritjet e tyre në arenën ndërkombëtare. “Çdo ekip shqiptar si Egnatia duhet të krenohemi çdo ditë. I dhashë dorën Aleksit për çfarë keni bërë në Europë. Sot kishim përballë një ekip kampion në fuqi, që vjen nga ngarkesa e ndeshjeve europiane. E kam provuar tre herë atë ngarkesë dhe duhet të jemi falënderues për atë çfarë po bën Egnatia”, u shpreh fillimisht tekniku. Duke analizuar ecurinë e takimit, Daja shpjegoi ndryshimin e qasjes mes dy fraksioneve të lojës. “Bëmë një pjesë të parë shumë të mirë. Në të dytën kaluam me një bllok të ulët. Na rezultoi se ishte strategji, jo thjesht taktikë, por rezultoi pozitive. Ishte e rëndësishme të ktheheshim te fitorja dhe te kreu i tabelës. Pjesa e dytë kërkonte një qasje tjetër, pasi Egnatia nuk ishte në kushte optimale fizike, ndaj na duhej të fitonim edhe me vuajtje”, shtoi ai. Kreu i stafit teknik të Dinamos foli gjithashtu edhe për situatat e diskutueshme në fushë dhe ndarjen e drejtësisë, duke bërë një krahasim me ndeshjet e mëparshme dhe duke sjellë në vëmendje trajtimin e lojtarëve të tij nga ana e gjyqtarëve gjatë dueleve. Në fund të prononcimit të tij, teksa u pyet për rëndësinë e kësaj fitoreje si një dhuratë e mundshme, Daja zgjodhi të bëjë një batutë me gazetarët: “Futbollistët janë të zgjuar. Ditëlindjen e organizon presidenti me klubin. Trajneri nuk harxhoi asnjë lek, as ne nuk harxhojmë asgjë”.