Samiti Trump-Xi në Shtëpinë e Bardhë: Ceremonia madhështore që fsheh mungesën e marrëveshjeve konkrete

Gjatë një prononcimi të shkurtër për mediat në Shtëpinë e Bardhë, lideri kinez, Xi Jinping, vuri theksin te bashkëpunimi ekonomik dhe tregtar mes dy fuqive të mëdha. Ai bëri thirrje për një partneritet të sinqertë, duke nënvizuar se Pekini mirëpret investimet e korporatave amerikane. "Ne duhet të bashkëpunojmë me sinqeritet. Kina mbetet e hapur për kompanitë amerikane që duan të investojnë dhe të angazhohen në vendin tonë. Në të njëjtën kohë, shpresoj që kompanitë kineze të trajtohen në mënyrë të drejtë në Shtetet e Bashkuara," deklaroi presidenti kinez gjatë kësaj vizite zyrtare në SHBA. Një tjetër temë me rëndësi të veçantë ishte edhe inteligjenca artificiale. Presidenti Xi tërhoqi vëmendjen se kjo teknologji duhet të zhvillohet nën monitorim të rreptë dhe të orientohet ekskluzivisht në dobi të njerëzimit. Nga ana tjetër, Presidenti Donald Trump shfaqi një qasje më optimiste, duke u fokusuar te mundësitë e jashtëzakonshme të kësaj fushe. Ai e cilësoi "superinteligjencën" si një mjet të fuqishëm që mund të garantojë paqe dhe mirëqenie për brezat e ardhshëm. Megjithatë, përtej ceremonive festive, pyetja që shtrohet është: cilat janë rezultatet konkrete të këtij takimi? Arritja e vetme e prekshme ishte një lloj "armëpushimi" tregtar dymujor, ku palët ranë dakord të pezullojnë tarifat e larta ndëshkuese dhe kufizimet e eksporteve deri më 10 janar. Përtej kësaj, nuk pati asnjë përparim të dukshëm në çështjet më të nxehta dypalëshe. Lista e mospajtimeve mes Uashingtonit dhe Pekinit mbetet jashtëzakonisht e gjatë dhe e pazgjidhur, duke filluar nga tregtia e çipave dhe inteligjenca artificiale, e duke vazhduar me sovranitetin e Tajvanit, ndikimin kinez në Iran dhe mbështetjen që Pekini i ofron Rusisë në konfliktin në Ukrainë. Përballë këtyre pikëpyetjeve, Sekretari amerikan i Shtetit, Marco Rubio, argumentoi se vetë mbajtja hapur e dialogut me rivalin kryesor gjeopolitik të Amerikës përbën një sukses. "Kjo është ekonomia e dytë më e madhe në botë, me një ushtri mjaft të fuqishme, e cila po kalon ndoshta procesin më të shpejtë të armatosjes në histori," deklaroi Rubio, duke vënë në dukje rëndësinë e shmangenies së përplasjeve të drejtpërdrejta. Ndërkohë, mikpritja luksoze që Trump i rezervoi homologut kinez ka ngjallur reagime të ashpra në skenën politike amerikane. Senatori demokrat, Chris van Hollen, lëshoi kritika të forta ndaj qasjes së presidentit: "Presidenti Trump bie vazhdimisht pre e një vetëmashtrimi. Ai përpiqet t'u bëjë lajka udhëheqësve autoritarë si Putini apo Xi, duke besuar se kështu mund të arrijë atë që dëshiron. Kjo është krejtësisht e gabuar. Trump mund ta konsiderojë veten negociatorin më të mirë në botë. Por fakti është se këta udhëheqës të huaj po i hedhin hi syve Shteteve të Bashkuara dhe po përfitojnë prej tyre." Sidoqoftë, pakënaqësitë nuk u kufizuan vetëm te kampi demokrat. Edhe figura të rëndësishme republikane, aleatë të Trumpit, shprehën rezerva për protokollin e përdorur. Senatori republikan Roger Wicker deklaroi hapur: "Nuk do t'i kisha këshilluar presidentit një pritje kaq pompoze për Xi Jinpingun."