Tensione të larta në Tiranë: Dita e 13-të e protestave degjeneron në përleshje para Kryeministrisë

Përplasjet e dhunshme mes protestuesve dhe forcave të rendit kanë kapluar sërish bulevardin kryesor para Kryeministrisë, ndërsa situata në terren është tensionuar ndjeshëm. Për të shpërndarë turmën, efektivët e policisë kanë ndërhyrë duke përdorur gaz lotsjellës dhe sprej piperit, ndërkohë që në aksion është futur edhe autoboti i ujit. Gjatë kësaj ndërhyrjeje janë raportuar edhe shoqërime të qytetarëve në komisariat, ku spikat rasti i një të riu që u shpëtua nga kapja e policisë falë ndërhyrjes së menjëhershme të bashkëmoshatarëve të tij. Tubimi i sotëm nisi rreth orës 14:00 para Ministrisë së Arsimit, për t'u zhvendosur më pas drejt institucioneve qendrore. Situata doli jashtë kontrollit kur një grup personash të maskuar hodhën gurë në drejtim të forcave të sigurisë dhe thyen xhamat e Kryesisë së Kuvendit. Para ndërtesës qeveritare, protestuesit grumbulluan dhe i vunë flakën karrigeve që ishin vendosur më parë nga kreu i ekzekutivit si një ftesë e hapur për tryezë dialogu. Më pas, turma e të rinjve marshoi drejt kryqëzimit afër sheshit “Skënderbej” për t'u kthyer sërish drejt bulevardit dhe goditjes së Kryeministrisë. Kërkesa kryesore e studentëve dhe protestuesve mbetet dorëheqja e menjëhershme e kryeministrit Edi Rama, duke hedhur poshtë çdo mundësi apo thirrje për dialog nga ana e tij. Ndërkohë, në të njëjtën ditë, kreu i Qeverisë prezantoi paketën e re ligjore, e cila sjell masa më të rrepta dhe gjoba të majme për personat që marrin pjesë në tubime të dhunshme.