Ekspertja amerikane: Vuçiç po aplikon metodat e Millosheviqit, qytetarët në Serbi paralajmërojnë kundërpërgjigje

Ivana Stradner, hulumtuese në Fondacionin amerikan për Mbrojtjen e Demokracive, ka ngritur alarmin pasi ka publikuar pamje të mjeteve të blinduara dhe ushtarake në rrugët e kryeqytetit serb. Sipas saj, presidenti serb Aleksandar Vuçiç po shfrytëzon skenarë të frikësimit gjatë procesit zgjedhor, duke ndjekur hapat e ish-liderit Sllobodan Millosheviq. Nëpërmjet një postimi në rrjetin social X, ekspertja bëri të ditur se popullata nuk do të tërhiqet para këtyre metodave dhe se pritet një reagim i ashpër gjatë mbrëmjes. "Vuçiç po përdor taktika tipike frikësimi gjatë zgjedhjeve në Serbi, njësoj si mentori i tij, Millosheviqi, gjatë viteve ’90. Por serbët nuk kanë frikë dhe janë të gatshëm të kundërpërgjigjen këtë mbrëmje", ka shkruar ajo, shoqëruar edhe me videon e automjeteve ushtarake në Beograd.