Hoffenheimi shkëlqen në derbi ndaj Leverkusenit, Fisnik Asllani kyç në suksesin e madh

Hoffenheimi ka regjistruar triumfin e tretë sezonal në elitën e futbollit gjerman, Bundesligë, pasi ka mposhtur bindshëm Bayer Leverkusenin me shifrat 3-0, në një takim ku paraqitja e sulmuesit shqiptar ishte vendimtare për rrjedhën e lojës. Përfaqësuesi i Kosovës, Fisnik Asllani, kontribuoi bashkë me bashkëkombësin e tij, Leon Avdullahu. Asllani u aktivizua deri në minutën e 84-t, ndërsa Avdullahu kompletoi të gjithë takimin, duke dhënë një kontribut të çmuar në këtë fitore të rëndësishme për skuadrën e tyre. Episodi që ndryshoi rrjedhën e ndeshjes u regjistrua në minutën e 78-të. Pas një ndërhyrjeje të palejuar ndaj Asllanit brenda zonës, kryesimtari Daniel Siebert konsultoi sistemin VAR dhe akordoi penallti në favor të vendasve. Nga pika e bardhë, në minutën e 79-të, sulmuesi Andrej Kramarić tregohet i pagabueshëm, duke e dërguar topin në rrjetë dhe duke zhbllokuar shifrat në 1-0 për Hoffenheimin. Ndërkohë që mysafirët u hodhën në sulm për të kërkuar barazimin, Alexander Prass realizoi një supergol në minutën e 89-të, duke e ndalur topin në këndin e sipërm të portës dhe dyfishuar epërsinë në 2-0. Megjithatë, festa e golit i kushtoi shtrenjtë autorit të tij, pasi Prass u ndëshkua me kartonin e dytë të verdhë për shkak të heqjes së fanellës gjatë festimit, duke u larguar me karton të kuq dhe lënë skuadrën me dhjetë lojtarë në sekondat e mbetura. Pavarësisht se mbeti me një lojtar më pak në fushë, Hoffenheimi nuk u ndal dhe arriti të realizojë edhe një herë tjetër. Në sekondat e fundit të shtesës, saktësisht në minutën e 90+5-të, Max Moerstedt përfitoi nga një top i devijuar brenda zonës dhe shënoi nga afër, duke vulosur rezultatin përfundimtar 3-0.