Kriza në shëndetësi, Dashnim Hebibi: Deri kur pacientët tanë do të kërkojnë shërim jashtë vendit?

Sistemi shëndetësor në trojet shqiptare vijon të përballet me sfida të mëdha, duke i detyruar pacientët që të kërkojnë shërim jashtë vendit përmes sakrificave të rënda financiare. Përballë kësaj situate kritike, ka reaguar sërish PhD. Dashnim Hebibi, i cili bën thirrje për përgjegjësi më të lartë institucionale dhe angazhim konkret për ngritjen e cilësisë në mjekësi. Kushtet jo optimale në sektorin e shëndetësisë mbeten një brengë e përditshme për qytetarët. Mungesa e trajtimeve të specializuara, vështirësitë në qasjen ndaj shërbimeve mjekësore dhe faturat e kripura të kurimit detyrojnë familjet tona të gjejnë zgjidhje jashtë kufijve. Edhe pse Tirana dhe Prishtina shërbejnë si qendra kryesore institucionale, ato ende nuk po arrijnë të përmbushin pritshmëritë e larta të pacientëve. Përballë pamundësisë së trajtimit të disa patologjive në vend, qytetarët detyrohen të drejtohen drejt spitaleve të huaja, përfshirë ato në Itali, duke shtruar pyetjen jetike: deri kur shqiptarët do të shpenzojnë kursimet e tyre për një shërbim që duhet ta merrnin në vendin e tyre? Dashnim Hebibi: Është koha të thërrasim ndërgjegjen Nuk është hera e parë që Dashnim Hebibi, i cili jeton e vepron në Zvicër dhe mbban detyrën e presidentit të Institutit Shkencor Helvetik të Evropës Juglindore, ngre zërin për hallet e bashkatdhetarëve të tij. Nëpërmjet një postimi të fundit publik, ai ka shprehur hapur shqetësimin për dështimin e sistemit shëndetësor vendor në mbrojtjen e shëndetit të qytetarëve. Në mesazhin e tij sensibilizues, Hebibi thekson: “Ja ku kemi mbërritur ne, shqiptarët! Pacientët tanë detyrohen të kërkojnë shërim në Itali, sepse sistemi ynë shëndetësor nuk arrin t’u garantojë trajtimin e nevojshëm. Deri kur kështu? Deri kur shëndeti dhe jeta e qytetarëve tanë do të varen nga spitalet e huaja? Një vend që nuk arrin t’i shërojë qytetarët e vet, duhet të reflektojë seriozisht për të ardhmen e tij.” Përmes këtij apelimi, diaspore-veprimtari sjell në vëmendje një dramë që prek mijëra familje shqiptare, të cilat përveç dhimbjes së sëmundjes, përballen edhe me barrën e rëndë ekonomike dhe emocionale të udhëtimeve jashtë shtetit. Domosdoshmëria e reformave dhe investimeve në shëndetësi Thirrja e ngritur nga Hebibi synon të nxisë debate konstruktive dhe veprime të menjëhershme për investime kapitale në institucionet mjekësore, pajisje bashkëkohore dhe mbështetjen e stafit profesionist. Një shëndetësi funksionale përbën shtyllën kurrizore të çdo shoqërie të zhvilluar, ndaj përmirësimi i shërbimeve duhet të kthehet në prioritet absolut kombëtar. Në këtë drejtim, bashkëpunimi i ngushtë me mjekët shqiptarë që punojnë në perëndim mund të shërbejë si urë lidhëse për transferimin e ekspertizës dhe ngritjen e standardeve klinike në Shqipëri dhe Kosovë, duke dëshmuar edhe një herë rolin e pazëvendësueshëm të diasporës në zhvillimin e vendit.