Kurti e Spajiq diskutojnë për fqinjësi të mirë dhe perspektivën evropiane në përmbyllje të Samitit të Procesit të Berlinit

Kryeministri i Republikës së Kosovës, Albin Kurti, ka zhvilluar një takim bilateral me homologun e tij nga Mali i Zi, Milojko Spajiq, me rastin e përfundimit të punimeve të Samitit të Procesit të Berlinit, ngjarje kjo e organizuar më 22 tetor në Shën Stefan të Malit të Zi. Gjatë këtij bashkëbisedimi, kreu i ekzekutivit kosovar i ka përcjellë falënderime kryeministrit malazez për mikpritjen e ngrohtë dhe menaxhimin e suksesshëm të Procesit të Berlinit gjatë këtij edicioni, ndërkohë që nuk kanë munguar as urimet për hapat e sigurt që Podgorica zyrtare po hedh drejt anëtarësimit në Bashkimin Evropian. "Kosova dhe Mali i Zi janë fqinjë të mirë dhe kanë të përbashkët hovin e progresit demokratik, siç tregojnë shpesh edhe vlerësimet ndërkombëtare. Mali i Zi është më pranë anëtarësimit në BE dhe jemi të interesuar të mësojmë nga përvoja e tij, teksa Kosova pret statusin e vendit kandidat dhe hapjen e negociatave për anëtarësim", ka theksuar Kurti gjatë takimit. Në qendër të vëmendjes së këtij takimi ishin gjithashtu mundësitë konkrete për intensifikimin e raporteve bilaterale, duke i dhënë prioritet të veçantë modernizimit dhe përmirësimit të lidhjeve të transportit e infrastrukturës tokësore ndërmjet dy shteteve.