Humbja e parë për Kosovën në Ligën e Kombeve, Austria tregon forcën në Vjenë

Përfaqësuesja e Kosovës ka regjistruar humbjen e parë në kuadër të edicionit të ri të Ligës së Kombeve, pasi është mundur me rezultatin 3:1 nga Austria në sfidën e zhvilluar në stadiumin “Ernst Happel” të kryeqytetit austriak, e vlefshme për xhiron e dytë të Grupit B3. Vendasit morën kontrollin e ndeshjes që në pjesën e parë, duke kaluar në avantazh në minutën e 23-të përmes David Affengruber, i cili realizoi saktë me kokë. Pak para se skuadrat të hynin në dhomat e zhveshjes, në minuta shtesë, Junior Adamu shfrytëzoi një rast për të dyfishuar epërsinë e austriakëve. Skenari i ndeshjes nuk ndryshoi as në fraksionin e dytë, ku në minutën e 61-të Carney Chukwuemeka thelloi avantazhin duke shënuar golin e tretë për vendasit. Përpjekjet e Kosovës sollën një reagim përmes Edon Zhegrovës, i cili u tregua i saktë nga pika e bardhë e penalltisë, mirëpo ky gol mjaftoi vetëm për të zbutur shifrat, pa mundur të kthejë fatin e takimit. Pas dy ndeshjeve të para në Grupin B3, Kosova mbetet në kuotën e tri pikëve, ndërkohë që Austria udhëheq renditjen e grupit me gjashtë pikë të grumbulluara.