Duoja shqiptare shkëlqen në Zvicër: Lugano mposht kampionin në fuqi

Futbollistët kosovarë, Uran Bislimi dhe Albian Ajeti, kanë qenë aktorët kryesorë në triumfin e bujshëm të Luganos, e cila ka mposhtur me shifrat 3:2 kampionin aktual të Zvicrës, Thun. Pjesa e parë solli lojë të hapur dhe gola nga të dyja palët. Për vendasit e Luganos zhbllokoi shifrat Moncada Arguijo në minutën e 33-të, kurse ekipi i Thunit reagoi shpejt duke barazuar rezultatin përmes Zoukit në minutën e 37-të. Fraksioni i dytë i takimit nisi nën petkun e futbollistëve shqiptarë. Uran Bislimi riktheu epërsinë e Luganos në minutën e 49-të, ndërsa sulmuesi Albian Ajeti, i futur në fushë si zëvendësues në minutën e 73-të, pati nevojë për vetëm tri minuta lojë për të tundur rrjetën në minutën e 76-të, duke shënuar golin e tretë për skuadrën e tij. Përpjekjet e Thunit për të ndryshuar rrjedhën e lojës sollën vetëm ngushtimin e diferencës në minutën e 88-të, kur Braschi u tregua i saktë nga pika e bardhë e penalltisë. Megjithatë, Lugano menaxhoi me sukses minutat e mbetura për të rrëmbyer tri pikët e radhës. Sa i përket paraqitjes individuale, Uran Bislimi e nisi sfidën nga minuta e parë dhe u largua nga fusha në minutën e 84-të, ndërsa Albian Ajeti konfirmoi statusin e lojtarit vendimtar duke ardhur nga banka e rezervave. Pas 11 ndeshjeve të luajtura deri më tani, Lugano vazhdon marshimin krejtësisht e qetë në krye të tabelës me 31 pikë të arkëtuara, pas 10 fitoreve dhe 1 barazimi, me një bilanc prej 34 golash të shënuar dhe vetëm nëntë të pranuar. Kjo e dërgon skuadrën e Luganos në një distancë prej gjashtë pikësh më shumë se ndjekësi më i afërt, Young Boys, ndërkohë që kampioni në fuqi, Thun, po kalon një periudhë të vështirë, duke u renditur në vendin e nëntë me vetëm 10 pikë në llogarinë e tij.