Spektakël dhe dramë në Gostivar: Bregallnica mposht Arsimin në shtesë me shtatë gola të shënuar

Ndeshja e vlefshme për javën e 11-të në Ligën e Parë të Maqedonisë së Veriut në futboll mes Arsimit dhe Bregallnicës është mbyllur me rezultatin 3:4, duke dhuruar një nga përballjet më emocionuese dhe më të pasura me gola të këtij sezoni. Përballja në Gostivar nisi me raste për vendasit, ku Aliti rrezikoi që në fillim, por portieri mysafir Filevski ndërhyri shkëlqyeshëm. Megjithatë, në minutën e 22-të, Kaba Jakupi zhbllokoi shifrat duke i dhënë epërsinë 1:0 Arsimit. Pas këtij momenti, Bregallnica mori kontrollin dhe arriti të përmbysë rezultatin para se skuadrat të shkonin në pushimin e pjesës së parë. Kocev barazoi në minutën e 31-të për 1:1, kurse Gligorov realizoi në minutën e 40-të për t'i dhënë epërsinë 1:2 skuadrës mysafire. Pjesa e dytë nisi me intensitet të lartë dhe raste shënimi. Edhe pse Maksimov lëshoi një mundësi të pastër, ishte Velkoski ai që shënoi në minutën e 52-të për ta çuar rezultatin në 1:3 në favor të Bregallnicës, duke vënë në vështirësi të mëdha skuadrën vendase. Kjo disavantazh bëri që Arsimi të hidhet në sulm me të gjitha forcat, duke sjellë një reagim të shpejtë brenda pak minutave. Goni ngushtoi epërsinë me një gol të shpejtë, ndërsa në minutën e 64-të, Ramadani realizoi një eurogol të vërtetë, një goditje mjeshtërore që vendosi barpeshën 3:3. Loja u bë edhe më e zjarrtë në vazhdim. Në minutën e 70-të, Gaje pati një shans të artë për ta përmbysur plotësisht rezultatin pas një gabimi të portierit Filevski, por fati ishte me mysafirët. Të dyja skuadrat vazhduan të rrezikonin përmes kundërsulmeve, duke lënë përshtypjen se goli i radhës mund të vinte në çdo çast. Kur duelit po i vinte fundi dhe gjithçka dukej se po shkonte drejt barazimit, në skenë doli sërish Bregallnica. Në minutën e 90+2, Natanielli shënoi golin e fitores dhe vulosi rezultatin përfundimtar 3:4, duke i siguruar skuadrës së tij tri pikë të arta në transfertë. Pas kësaj xhiroje të 11-të, Bregallnica renditet në vendin e 7-të me 13 pikë të grumbulluara, ndërsa Arsimi pozicionohet një shkallë më poshtë, me vetëm një pikë më pak.