Gara me kohën për Thibaut Courtois, portieri nuk dorëzohet para El Clasicos

Përballja e madhe e njohur si El Clasico mbetet ende një objektiv i arritshëm për portierin e Real Madridit, Thibaut Courtois, i cili refuzon të dorëzohet lehtësisht. Edhe pse gjatë mëngjesit të së dielës klubi mbretëror njoftoi se guardameta belg u la jashtë listës së futbollistëve të grumbulluar për shkak të një viroze gripi, vetë lojtarë është i vendosur të provojë shanset e tij deri në sekondat e fundit për të qenë në fushë kundër Barcelonës. “Do të shohim se si do të kalojnë orët e ardhshme dhe nëse ai do të ndihet më mirë. Nëse ndodh kështu, do të udhëtojë drejt Barcelonës”, kanë bërë të ditur burime nga Valdebebas, qendra zyrtare stërvitore e Real Madridit. Sakaq, nga radhët e klubit shtojnë me optimizëm: “Shpresojmë që të rikuperohet plotësisht dhe të mund të udhëtojë”. Ndonëse raporti mjekësor i publikuar paraprakisht paralajmëronte mungesën e tij të sigurt, mundësia që gardiani belg të bashkohet me skuadrën në Katalonjë vazhdon të jetë e hapur, në varësi të përmirësimit të gjendjes së tij shëndetësore gjatë ditës. Courtois është i qartë se nuk dëshiron të mungojë në një duel kaq vendimtar dhe është i gatshëm të shfrytëzojë çdo mundësi të vogël për të mbrojtur portën e Real Madridit në këtë sfidë prestigjioze.