Dhuna e policisë ndaj protestuesit, Agron Shehaj viziton piktorin në spital: U la i plagosur në rrugë si kriminel

Kryetari i Partisë “Mundësia”, Agron Shehaj, ka zhvilluar një vizitë në spital për protestuesin që mbeti i lënduar mbrëmjen e djeshme, pasi u dhunua nga efektivat e policisë me shkop gome dhe u la pa ndihmën e parë në asfalt. Sipas kreut të kësaj force politike, i dëmtuari është një artist që ka dalë rregullisht në shesh për të protestuar për plot 150 ditë me radhë. “Vizitova në spital Lulzimin, i cili është piktor me profesion. Policia e ka goditur dhe e ka lëshuar të shtrirë në tokë pa ndihmë, ndërkohë që pranë tij ndodhet bashkëshortja. Shpresoj që Lulzimi, i cili prej 150 ditësh nuk ka munguar asnjë ditë në protestë, të shërohet dhe ta marrë veten sa më parë”, ka shkruar Shehaj në rrjetet sociale. Më tej, ai ka bërë të ditur se struktura juridike e partisë që drejton do të angazhohet plotësisht për t'i siguruar mbështetje ligjore, me qëllim që autorët e këtij akti të dhunës të mbajnë përgjegjësi para drejtësisë. “Avokatët e Partisë ‘Mundësia’ do t’i ofrojnë atij çdo ndihmë të nevojshme ligjore, që përgjegjësit të përballen me ligjin dhe Lulzimi të vendosë drejtësi”, ka theksuar Shehaj.