Barazim i vlefshëm në Durrës, mesfushori i Elbasanit: E dinim forcën e Teutës

Elbasani ka arritur të dalë i pamposhtur nga stadiumi “Niko Dovana”, duke marrë një pikë të rëndësishme në transfertë përballë Teutës, pas një ndeshjeje të mbyllur me rrjeta të paprekura, 0-0. Një nga protagonistët kryesorë të kësaj sfide ishte mesfushori i skuadrës verdheblu, Ibrahim Abbas, i cili u shpall “Lojtari i Ndeshjes” dhe ndau përshtypjet e tij me gazetarët pas përfundimit të takimit. “Së pari, faleminderit të gjithëve. E dinim se na priste një përballje tepër e komplikuar,” u shpreh Abbas në prononcimin e tij. “Përballë kishim skuadrën që kryeson renditjen e kampionatit. Megjithatë, forma e mirë dhe rezultatet pozitive na japin garanci dhe optimizëm për sfidat që na presin në vazhdim,” shtoi ai. Duke folur për kontributin e tij në fushë dhe dinamikën e skuadrës, mesfushori theksoi se meritën e ka i gjithë grupi, ndërsa përmendi edhe risitë rregullatore: “Nuk jam vetëm unë që po ndihmoj Boriçin te Elbasani, pasi është i gjithë ekipi që punon bashkë, pa harruar edhe rregullin e ri që po mbështet dhe promovon talentet e rinj shqiptarë.” Në fund, Abbas foli edhe për ndryshimet në pankinë dhe procesin e përshtatjes: “Kemi vetëm tri ditë që kemi nisur punën me trajnerin e ri. Jemi duke bërë maksimumin si grup për të kuptuar dhe zbatuar skemat e tij taktike. Për fat të mirë, gjithçka shkoi në drejtimin e duhur.”