Rama refuzon dorëheqjen dhe fton në bisedime: S’e tradhtoj besimin e shqiptarëve për një Shqipëri në BE

Kryeministri Edi Rama ka paraqitur sot para medieve një paketë të re ligjore, e cila synon të luftojë dhunën dhe atë që ai e ka quajtur anarki urbane. Gjatë shtjellimit të gjashtë pikave kryesore të kësaj nisme, kreu i qeverisë është përgjigjur edhe lidhur me thirrjet për largimin e tij nga detyra, duke theksuar se një kërkesë e tillë nuk mund t'i diktohet, ndërkohë që ka përsëritur ftesën e tij për tryezë dialogu. “Kjo paketë nuk përmban asnjë risi të paprecedentë apo që cenon liritë dhe të drejtat qytetare. Kushdo që nuk e mbështet keverinë ose kërkon largimin tim, ka plotësisht të drejtën ta shprehë apo ta shndërrojë në protestë. Unë mbetem i hapur të ulem dhe të dëgjoj secilin që dëshmon vullnet të paraqesë kërkesat e tij, pasi besoj se ata që kërkojnë dorëheqjen time gabojnë kur mendojnë se mund të arrijnë diçka përmes dhunës apo metodave të tjera, ndonëse kjo nuk do të thotë se çdo mendim apo qëndrim i tyre është i gabuar”, u shpreh kryeministri. “Pavarësisht nëse më keni votuar apo jo, unë nuk e kam shkelur misionin për të cilin më është besuar drejtimi nga shumica dhe nuk do ta zhgënjej kurrë besimin e asnjë qytetari shqiptar që ëndërron një vend më të mirë dhe që dëshiron që flamuri i Ismail Qemalit dhe i Skënderbeut të valëvitet krah flamujve të tjerë brenda Bashkimit Evropian”, përfundoi fjalën e tij Rama.