Nga “La Masia” te Real Madridi: Marc Cucurella rrezikon një pritje armiqësore në “Camp Nou”

Marc Cucurella pritet të jetë një ndër figurat kryesore të “El Clasicos” që do të zhvillohet këtë të diele, ku Real Madridi do të masë forcat me Barcelonën në stadiumin “Camp Nou”. Mbrojtësi i krahut të majtë, i cili ka diktuar gjashtë vite të karrierës së tij në akademinë e klubit katalunas, do të kthehet në ambientin ku u formua, por kësaj radhe si kundërshtar me fanellën e rivalit historik. Edhe pse ka qenë pjesë e “La Masia”-s, Cucurella nuk ka regjistruar asnjë paraqitje zyrtare me skuadrën e parë të Barcelonës në këtë stadium, ndërsa e kaluara e tij sportive nuk pritet ta mbrojë nga reagimi i ashpër i tifozëve vendës. Debutimi i tij zyrtar me fanellën kuqeblu kishte ndodhur nën urdhrat e Ernesto Valverdes, i cili e aktivizoi për tetë minuta në një takim të Kupës së Mbretit kundër Murcias. Megjithatë, duke mos e parë ende të gatshëm për nivelet e larta të ekipit të parë, trajneri preferoi Juan Mirandan si mbështetje për Jordi Alban. Gjatë karrierës së tij, mbrojtësi spanjoll e ka vizituar tri herë “Camp Nou” si kundërshtar – dy herë me fanellën e Getafes dhe një herë me atë të Eibarit – por në të gjitha rastet është mposhtur. Gjatë merkatos së verës së shkuar, lojtari kishte shqyrtuar një rikthim të mundshëm në elitën e futbollit spanjoll. Barcelona ishte e hapur për ta marrë në konsideratë në rast të një largimi të mundshëm të Alejandro Baldes, por mungesa e një oferte konkrete nga katalunasit bëri që emri i tij të lidhet edhe me Atletico Madridin. Përfundimisht, ishte Jose Mourinho ai që e bindi mbrojtësin t'i bashkohet projektit të Real Madridit, një lëvizje kjo që solli pakënaqësi dhe kritika nga mbështetësit e Barcelonës, të cilët nuk e kanë harruar lidhjen e tij të mëparshme me akademinë e klubit. Përveç presionit të pritshëm nga shkallët e stadiumit, Cucurella do të ketë përpara një sfidë jashtëzakonisht të ndërlikuar edhe në fushën e blertë, ku pritet të kryqëzojë rrugët me Lamine Yamalin. Ky duel premton të jetë ndër pikat kyçe të “El Clasicos”, në një ndeshje ku rivaliteti mbetet në nivelet më të larta.