Tragjedi në Skenderaj: Humb jetën 79-vjeçari që u gjet pa ndjenja në rrugën e Likocit

Një ngjarje e rëndë ka tronditur ditën e djeshme fshatin Likoc të Skenderaj, ku një 79-vjeçar është gjetur i shtrirë në tokë dhe fatkeqësisht ka ndërruar jetë, pak pasi është transportuar në spital. Bëhet fjalë për viktimën F.Z., 79 vjeç. Sinjalizimet e para për këtë rast kanë mbërritur në stacionin policor më 24 tetor, rreth orës 14:00, pasi kalimtarët e rastit kishin vënë re personin e shtrirë përgjatë rrugës. Menjëherë pas sinjalizimit, i moshuari është dërguar me urgjencë në Qendrën Kryesore të Mjekësisë Familjare në Skenderaj. Megjithatë, pavarësisht ndërhyrjes së stafit mjekësor, rreth orës 15:00 është konfirmuar zyrtarisht vdekja e tij. Forca të shumta të rendit dhe ekipe hetimore kanë reaguar menjëherë, duke dalë fillimisht në ambientet e QKMF-së e më pas në vendin e ngjarjes. Në zbardhjen e rrethanave janë përfshirë edhe hetuesit rajonalë, ndërkohë që dy dëshmitarë janë marrë në pyetje nga autoritetet. Prokurori kujdestar është vënë në dijeni për ngjarjen dhe ka urdhëruar dërgimin e trupit të pajetë në Institutin e Mjekësisë Ligjore për t'i nënshtruar obduksionit. Ndërkohë, policia ka iniciuar rastin zyrtar si “Hetim mbi vdekjen”, ndërsa shkaqet e sakta se pse ka ndërruar jetë 79-vjeçari pritet të zbulohen pas përfundimit të ekzaminimeve mjekoligjore.