Tensione dhe dhunë në Serbi: Rreth 30 persona sulmojnë anëtarët e këshillave zgjedhorë në Dolevac

Procesi zgjedhor në Dolevac të Serbisë është shoqëruar me incidente të rënda fizike në katër qendra të ndryshme votimi, konkretisht në vendvotimet 22, 25, 27 dhe 32, bëjnë të ditur të dhënat nga Grupi Joformal i Studentëve të Nishit. Këto zhvillime negative, sipas paralajmërimeve zyrtare, kanë rrezikuar seriozisht integritetin e stafit zgjedhor dhe kanë kompromentuar mbarëvajtjen e rregullt të zgjedhjeve në këtë zonë. Dragana Milutinoviq, e cila është avokate dhe njëkohësisht anëtare e Asamblesë së qytetit të Nishit, ka bërë të tohur se një grup prej rreth 30 personash ka ndërmarrë një sulm fizik dhe verbal ndaj stafit të angazhuar në këshillin zgjedhor, situatë kjo që e detyroi atë të njoftonte menjëherë strukturat e rendit. Megjithatë, pavarësisht thirrjeve, forcat e policisë të cilat dolën në vendin e ngjarjes refuzuan të futeshin brenda objekteve të votimit. “Policia mbërriti në qendrën e votimit, por nuk hyri brenda. Ata pretenduan se nuk mund të hynin, pasi nuk ishin thirrur nga anëtarët e këshillit zgjedhor”, tha Milutinoviq. Edhe përfaqësuesit e studentëve konfirmuan se njësitet policore ndodheshin jashtë godinave të votimit, por theksuan se efektivët abstenuan nga ndërhyrja me arsyetimin se mungonte një kërkesë formale nga kryetari i këshillit zgjedhor. Në terren janë pozicionuar edhe ekipe avokatësh, të cilët po kërkojnë presion dhe veprim urgjent nga ana e organeve të zbatimit të ligjit. “Kërkojmë që autoritetet kompetente të marrin pa vonesë të gjitha masat e nevojshme brenda juridiksionit të tyre, të garantojnë sigurinë e anëtarëve të këshillave zgjedhorë dhe të qytetarëve, si dhe të mundësojnë ushtrimin e papenguar të së drejtës së votës”, thuhet në deklaratën e studentëve. Në fund, Grupi Joformal i Studentëve nga Nishi ka theksuar se mbetet në pritje të lëvizjeve konkrete nga ana e institucioneve përgjegjëse për rivendosjen e qetësisë dhe mbrojtjen e plotë të të gjithë akterëve të përfshirë në këtë proces.