A ndikon cikli menstrual te stërvitja? Çfarë zbulon shkenca për këtë trend viral

Rrjetet sociale si TikTok dhe Instagram janë pushtuar së fundmi nga një trend që i fton gratë të organizojnë aktivitetin e lor fizik bazuar në fazat e ciklit menstrual. Megjithatë, zërat shkencorë ngrenë shqetësim se ende mungojnë dëshmitë e mjaftueshme për të vendosur plane strikte stërvitjeje për secilën prej këtyre periudhave. Kjo metodë, e pagëzuar si “sinkronizimi i ciklit”, propozon që gjinia femërore të ndryshojë ritmin dhe llojin e lëvizjeve në palestër ose natyrë në përputhje me luhatjet hormonale gjatë gjithë muajit. Sipas këtij fenomeni online, periudha e menstruacioneve kërkon ushtrime më të lehta si ecja apo Pilatesi. Ndërkohë, gjatë fazës folikulare sugjerohet shtimi i ngadaltë i ritmit, kurse në kohën e ovulacionit preferohen seanca më të forta dhe ngrënie peshash. Përsa i përket fazës luteale, këshillohet sërish një qasje më e qetë. Megjithatë, bazuar në të dhënat e transmetuara nga BBC, bota akademike nuk i pranon këto udhëzime si standarde të detyrueshme për çdo grua. Ekspertja e ciklit menstrual dhe aktivitetit fizik në Universitetin Leeds Beckett, Kelly McNulty, thekson se pavarësisht se disa femra mund të vënë re luhatje të energjisë, simptomave apo rezultateve përgjatë muajit, kjo nuk nënkupton se të gjitha duhet t'i përmbahen të njëjtit program. Një nga pengesat kryesore mbetet fakti se cikli ndryshon ndjeshëm nga një person te tjetri, madje edhe te e njëjta grua nga një muaj në tjetrin. Kjo e bën të vështirë krijimin e një formule universale, sidomos për ato që kanë cikle të çrregullta ose përdorin metoda kontraceptive hormonale. Ekspertët këshillojnë të dëgjoni trupin Ka gra që konstatojnë ndryshime të niveleve të energjisë dhe e organizojnë stërvitjen sipas ndjesive të tyre personale. Cesci Burgoyne, e cila ushtron profesionin e infermieres, trajnieres dhe nutricionistes në Sydney, tregon se fazën luteale e kalon me intensitet më të ulët, ndërsa në fazën folikulare ndihet e mbushur me energji dhe mund t'i përkushtohet vrapimeve të gjata apo ushtrimeve më të rënda. Pavarësisht kësaj, specialistët paralajmërojnë se ideja e gabuar se gratë janë domosdoshmërisht më të dobëta gjatë një faze të caktuar mund të ndikojë mbrapsht te performanca e tyre. Ky duket si efekti “nocebo”, ku pritshmëritë negative dëmtojnë përvojën reale të individit. Sipas studiuesve, ulja e panevojshme dhe e vazhdueshme e stërvitjes së forcës mund të pengojë arritjen e rezultateve. Këto lloj ushtrimesh janë jetësore për mbrojtjen e shëndetit të eshtrave dhe parandalimin e osteoporozës në pleqëri. Cikli si udhëzues, jo si rregull Në asnjë moment ekspertët nuk janë kundër gjurmimit të ciklit menstrual. Përkundrazi, monitorimi i luhatjeve të energjisë, humorit, dhimbjeve dhe vullnetit ndihmon gratë të njohin më mirë trupin e tyre. Gjatë ditëve me shqetësime më të theksuara, zgjedhja e një stërvitjeje të lehtë ose e një dite pushimi është plotësisht e logjikshme. E kundërta ndodh kur rezervat e energjisë janë në maksimum, ku aktiviteti mund të jetë më i ngarkuar. Megjithatë, dhimbjet e mëdha, lodhja e skajshme apo ndryshimet e papritura të humorit që prishin jetën e përditshme nuk duhen konsideruar kurrë si normale dhe kërkojnë vëmendje mjekësore. Në vend që cikli të shërbejë si një kalendar me rregulla të ngurta për ushtrimet, specialistët rekomandojnë që ai të merret thjesht si një udhërrëfyes për t'iu përshtatur nevojave unike të çdo individi.