Natë tmerri në Florida: 12 të plagosur nga armët e zjarrit pranë kampusit universitar

Një ngjarje e rëndë ka tronditur qytetin Tallahassee në shtetin e Floridës, ku të paktën 12 persona, mes tyre edhe gjashtë të mitur, kanë mbetur të plagosur si pasojë e një sulmi me armë zjarri të ndodhur gjatë orëve të natës. Incidenti ka alarmuar autoritetet vendase dhe drejtuesit e institucionit të arsimit të lartë, të cilët kanë konfirmuar se ngjarja ka ndodhur në afërsi të stadiumit të Universitetit Florida A&M. Sipas informacioneve zyrtare të bëra publike nga Departamenti i Policisë së Tallahassee, 11 prej viktimave kanë pësuar plagë direkte nga predha armësh zjarri. Nga totali i të lënduarve, tre persona po trajtohen me plagë të rënda dhe ndodhen nën kujdesin intensiv të mjekëve, ndërsa nëntë të tjerët janë jashtë rrezikut për jetën dhe gjendja e tyre shëndetësore paraqitet e qëndrueshme. Ngjarja tragjike është regjistruar në zonën ngjitur me stadiumin universitar, menjëherë pas përfundimit të një ndeshjeje futbolli që ishte zhvilluar në fushat e këtij universiteti. Plagosja masive ka sjellë reagimin e menjëhershëm të autoriteteve universitare, të cilët kanë lëshuar një apel urgjent për të gjithë qytetarët dhe studentët që ndodheshin në atë zonë, duke u kërkuar që të strehohen në vende të sigurta ose të largohen menjëherë nga hapësira e rrezikut. Aktualisht, grupet hetimore të policisë ndodhën në terren dhe po vijojnë me intensitet hetimet për zbardhjen e plotë të rrethanave të ngjarjes. Deri në këto momente, autoritetet bëjnë me dije se nuk është realizuar asnjë arrestim dhe nuk ka ende ndonjë person të dyshuar të ndaluar zyrtarisht.