Riparimi në Kosova B: Njësia B2 pritet t’i kthehet prodhimit këtë të hënë

Korporata Energjetike e Kosovës ka njoftuar se procesi i riparimit të prishjes së shfaqur në bllokun B2 të Termocentralit Kosova B po ecën me ritme të shpejta, ndërsa synohet që ndërhyrja të mbyllet plotësisht deri të dielën në mbrëmje. Sipas parashikimeve të korporatës, rifutja e kësaj njësie në rrjetin energjetik do të ndodhë në orët e para të mëngjesit të së hënës, më 26 tetor, respektivisht rreth dy ditë pas shkyçjes së kontrolluar për shkak të problemeve teknike. Përmes një deklarate zyrtare, menaxhmenti i KEK-ut ka shprehur mirënjohje për punën dhe angazhimin e pandërprerë të ekspertëve teknikë dhe stafit operativ, të cilët po angazhohen maksimalisht për sanimin e shpejtë të difektit dhe stabilizimin e gjendjes. “Defektet teknike janë dukuri që mund të paraqiten në çdo termocentral në botë”, theksohet në komunikatën e lëshuar nga Korporata Energjetike e Kosovës. Në fund, KEK ka siguruar qytetarët se publiku do të informohet në mënyrë të menjëhershme sapo njësia B2 të rikthehet zyrtarisht në punë dhe të nisë prodhimin e energjisë.