Dhuna ndaj protestuesve në Tiranë, deputetja Mariana Koçeku: Rrahja e qytetarëve shton arsyet për të qëndruar në shesh

Deputetja e pavarur, Mariana Koçeku, ka ngritur zërin kundër akteve të dhunës të regjistruara gjatë protestave në kryeqytet, duke i quajtur ato të papranueshme dhe duke pohuar se këto skena vetëm sa forcojnë vendosmërinë e qytetarëve për të vazhduar protestën. Në mesazhin e saj publik, Koçeku vë në dukje se vala e parë e protestave masive u nxit nga trajtimi çnjerëzor ku një qytetar u tërhoq zvarrë, ndërsa së fundmi, sipas dëshmive të saj, një tjetër protestues ka pësuar lëndim të rëndë duke u goditur në sy. "Herën e parë protestat shpërthyen masivisht se u mor zvarrë nji njeri. Sot pamë nji tjetër njeri që u godit në sy. E ndigjuem edhe britmën e tij", ka shkruar ajo në reagimin e saj. Më tej, ligjvënësja ka hedhur akuza të forta ndaj qeverisë, duke e akuzuar atë se po përdor dhunën fizike ndaj trupit të qytetarëve si një metodë për të mbjellë panik dhe terror në shoqëri, ndërsa ka përfunduar se çdo akt dhune vetëm sa legjitimon më shumë rezistencën në sheshe. "Pushteti vazhdon me e trajtu trupin e qytetarit si vendin ku duhet me u ngulë frika. Por çdo goditje ndaj nji protestuesi e ban edhe ma të qartë pse njerëzit vazhdojnë me qëndru në shesh", ka mbyllur deklaratën e saj deputetja e pavarur Mariana Koçeku.