Tensione dhe përplasje të dhunshme në Francë: 135 të arrestuar gjatë protestave mbarëkombëtare

Vala e protestave në Francë ka shënuar një tjetër kthesë të tensionuar këtë të shtunë, ku demonstruesit janë përplasur me forcat e rendit në qytetin e Marsejës. Ndërkohë, në kryeqytetin Paris, mijëra qytetarë kanë mbushur rrugët për të shprehur pakënaqësinë e tyre ndaj pabarazisë sociale dhe buxhetit të pamjaftueshëm për shërbimet publike, me tensionet që janë përhapur në disa rajone të tjera të vendit. Në Marsejë, incidentet shpërthyen pranë zonës Porte d’Aix, ku ishte parashikuar të përfundonte një marshim zyrtar. Disa të rinj, me fytyra të mbuluara me maska skijimi dhe kundër gazit, përdorën pllaka të rënda metalike për të bllokuar rrugët dhe për të ngritur barrikada. Turma e protestuesve iu përgjigj policisë duke hedhur gurë, shishe dhe fishekzjarrë në drejtim të efektivëve. Si kundërpërgjigje, agjentët e rendit përdorën sasi të konsiderueshme gazit lotsjellës dhe ndërhynë me mburoja e shkopinj gome për të shpërndarë turmën e irrituar. Reagimi me gaz lotsjellës u shtri edhe në një rrugicë ngjitur me zonën e protestës, duke detyruar pjesëmarrësit të tërhiqeshin me shpejtësi drejt sheshit kryesor. Në Paris, planet e organizatorëve ndryshuan në momentet e fundit, por kjo nuk i ndali mijëra qytetarë që të grumbulloheshin në pikën e caktuar në juglindje të metropolit. Ky zhvendosim i papritur i vendndodhjes solli reagime të ashpra nga disa prej pjesëmarrësve, të cilët e interpretuan këtë lëvizje si një taktikë për t'i ulur dukshmërinë protestës. “Kjo është një skemë për t’i përçarë dhe dekurajuar njerëzit”, u shpreh 35-vjeçari Vincent Charache, punonjës bashkiak që udhëtoi dy orë me tren nga Nevers për të protestuar kundër humnerës ekonomike mes të pasurve dhe të varfërve. Nga ana e tij, 19-vjeçari Meylan Eponoh, student i punës sociale, theksoi se tubimi synonte gjithashtu të ngrinte zërin kundër fondeve të pakta për shkollat në lagjet e punëtorëve. “Ata duan të na bëjnë të padukshëm në periferi të Parisit”, u shpreh ai, duke shpresuar se marshimi do të arrinte të futej në zemër të kryeqytetit. Në kontrast të plotë me trazirat në Marsejë, situata në Orléans ka qenë plotësisht paqësore. Mijëra qytetarë dolën në rrugë që në orët e para të mëngjesit, duke u mbledhur në një hapësirë ku vullnetarët u kujdesën për shpërndarjen e ushqimeve dhe pijeve. Aty u ngrit një skenë ku personalitete të ndryshme, përfshirë kryebashkiakun e Trappes, Ali Rabeh, si dhe nxënës të shkollave të mesme, mbajtën fjalime motivuese që u pritën me duartrokitje të ngrohta nga publiku. Të dhënat zyrtare të bëra publike nga zyrtari i Ministrisë së Brendshme, Laurent Nuñez, konfirmojnë se deri të shtunën pasdite numri i të ndaluarve kishte arritur në 135 persona. Pjesa më e madhe e arrestimeve u kryen gjatë kontrolleve të imtësishme, pasi autoritetet gjetën tek disa prej protestuesve armë dhe mjete të tjera të ndaluara, përfshirë pajisje për lëshimin e fishekzjarrëve dhe një shpatë tradicionale japoneze samurai. Sipas vlerësimeve të Nuñez, rreth 35 mijë veta morën pjesë në protestat kombëtare, shifër kjo më e ulët krahasuar me fundjavën e kaluar. “Ne do të ruajmë një nivel të lartë vigjilence gjatë gjithë pasdites së sotme”, deklaroi ai. Për të garantuar rendin dhe sigurinë gjatë këtyre tubimeve, qeveria franceze ka angazhuar rreth 70 mijë efektivë policie në të gjithë territorin e vendit.