Krijohet qetësia në kryeqytet, forcat e rendit shpërndajnë turmën dhe nisin pastrimin e bulevardit

Pas disa orësh tensionesh dhe aktesh të dhunshme të shënuara gjatë mbrëmjes së sotme në Tiranë, struktura e Policisë së Shtetit ka ndërhyrë duke shpërndarë protestuesit. Me zbatimin e masave të sigurisë nga forcat e rendit, rrugët kryesore të kryeqytetit janë boshatisur plotësisht, duke sjellë rikthimin e normalitetit dhe qetësimin e situatës në zonën e prekur nga përleshjet. Aktualisht, në bulevardin “Dëshmorët e Kombit” ka filluar puna për pastrimin e terrenit nga gurët, mbetjet dhe mjetet e forta që u përdorën dhe u hodhën drejt efektivëve gjatë incidenteve të ndodhura mes palëve. Tubimi i sotëm u shoqërua me momente të nxehta tensioni dhe përplasjesh fizike, ku pjesëmarrësit në protestë ngritën thirrje të herëpahershme dhe kërkuan largimin nga detyra të kryeministrit Edi Rama.