Protesta para Kryeministrisë: Aktivisti Kola lëshon akuza të forta ndaj Ramës dhe përmend skandalin e Vlora Hysenit

Protestat e qytetarëve kundër ekzekutivit dhe kryeministrit Edi Rama kanë vazhduar edhe ditën e sotme, duke mbledhur qytetarë dhe aktivistë në kryeqytet. Nisja e marshimit u bë nga sheshi "Skënderbej" drejt ndërtesës së Kryeministrisë. Gjatë fjalës së tij, aktivisti Arben Kola deklaroi se kreu i qeverisë nuk ka më asnjë lloj alibie për të vijuar detyrën, duke e lidhur këtë me skandalin e lidhur me Vlora Hysenin. Ai u bëri thirrje strukturave të posaçme të SPAK-ut dhe BKH-së që të ndërhyjnë dhe të nisin procedurat për arrestimin e tij. Sipas Kolës, gjatë vizitës në Nju Jork në kuadër të javës së OKB-së, kryeministri nuk ka siguruar asnjë takim zyrtar me liderë të huaj, duke e cilësuar udhëtimin si një dështim diplomatik dhe duke shtuar se ai është braktisur nga ndërkombëtarët. Aktivisti u ndal gjithashtu te çështja e shërbimeve sekrete, duke aluduar se në aleancën e NATO-s po diskutohet mbi një skandal spiunazhi që përfshin Vlora Hysenin kundër vendeve anëtare, çka sipas tij e lë kryeministrin pa asnjë mbrojtje politike.