Tensione në Tiranë gjatë protestës: Sulmohen bizneset dhe dëmtohet filiali i bankës te 'Vasil Shanto'

Përshkallëzim i situatës është regjistruar gjatë orëve të fundit në kryeqytet, ku pjesëmarrësit në protestë kanë ndërmarrë veprime të dhunshme duke shkatërruar pronën private dhe publike. Protestuesit i kanë vënë zjarrin kontenierëve të mbeturinave dhe kanë shkatërruar xhamat e disa njësive tregtare, duke përfshirë edhe një degë të një banke të nivelit të dytë në zonën e njohur si “Vasil Shanto”. Gjatë këtij akti vandalizmi, turma ka thyer dritaret dhe ka dëmtuar rëndë bankomatin e bankës në fjalë. Më pas, sulmi është drejtuar edhe ndaj një dyqani tjetër tregtar në afërsi, xhamat e të cilit u bënë copë-copë, para se autorët të largoheshin me shpejtësi nga vendngjarja. Për të penguar lëvizjen, protestuesit kanë zhvendosur koshat e mbeturinave në mes të rrugës, duke krijuar barriera improvizuese. Po ashtu, ata kanë hequr dhe hedhur në rrugë edhe barrierat mbrojtëse prej hekuri të vendosura përgjatë trotuareve. Këto akte të prishjes së rendit janë shënuar gjatë zhvillimit të marshimit të protestuesve nëpër rrugët e Tiranës, një tubim ky që ka vazhduar për disa orë me radhë.