Zgjedhjet në Luginë, Albin Kurti kërkon mobilizim të shqiptarëve për listën e përbashkët

Kryeministri i Republikës së Kosovës, Albin Kurti, i ka ftuar qytetarët shqiptarë në Preshevë, Bujanoc dhe Medvegjë që të dalin masivisht në zgjedhje dhe t'i japin mbështetjen e tyre “Koalicionit Shqiptar”, i cili mban numrin 17 në fletëvotim. Përmes një adresimi publik, kreu i ekzekutivit kosovar ka sjellë në vëmendje takimin e zhvilluar më 29 shtator në zyrat e tij me krerët e forcave politike shqiptare, tubim ky që u kurorëzua me arritjen e konsensusit për të garuar nën një emblemë dhe listë të vetme. Kurti ka vënë në pah se banorët autoktonë shqiptarë të këtyre tri komunave gëzojnë të drejtën legjitime për të jetuar e punuar në trojet e tyre me shanse të barabarta, duke e cilësuar votën si një përgjigje qytetare e demokratike ndaj politikave të diskriminimit, margjinalizimit dhe shtypjes. Po ashtu, shefi i qeverisë u ka bërë thirrje të veçantë të gjithë bashkëkombësve që jetojnë e veprojnë në Kosovë, por që figurojnë në listat zgjedhore të Preshevës, Bujanocit dhe Medvegjës, që të udhëtojnë drejt vendlindjeve të tyre për të ushtruar të drejtën e votës.