Goditje e rëndë për PSG-në, klubi parizien pikaton zëvendësuesin e Kvaratskhelias në merkato

Paris Saint-Germain po përgatitet të ndërhyjë fuqishëm në sesionin e transferimeve të muajit janar, pasi dëmtimi i rëndë i Khvicha Kvaratskhelias e ka detyruar yllin gjeorgjian të mbyllë para kohë këtë edicion futbollistik. Sipas raportimeve nga Eurosport, drejtuesit e kampionëve të Francës kanë identifikuar tashmë profilin ideal për të mbuluar këtë mungesë të madhe në repartin ofensiv, duke e kthyer vëmendjen te Nico Williams. Interesimi i parizienëve për anësorin spanjoll nuk është një risi. Klubi nga Parc des Princes kishte tentuar ta afronte atë që gjatë merkatos së verës së vitit 2024, periudhë kur në garë ishte futur edhe Barcelona, megjithatë futbollisti kishte zgjedhur të vazhdonte bashkëpunimin me Athletic Club përmes rinovimit të kontratës. Tashmë, emergjenca për të gjetur një përforcim cilësor në krahun e majtë të sulmit mund ta shtyjë PSG-në që të ndërmarrë hapa konkretë për ta transferuar atë në Francë. Aktualisht, Williams është i lidhur me Athletic Club përmes një marrëveshjeje që zgjat deri në vitin 2035 dhe përfshin një klauzolë lirimi prej 95 milionë eurosh.