Mospërfillja e rregullave mjedisore kushton shtrenjtë: Gjobitet Drejtoria e Inspekcionit e Prishtinës

Ministrja e Mjedisit dhe Planifikimit Hapësinor, Fitore Pacolli, ka bërë të ditur se Inspektorati i Mjedisit ka shqiptuar një gjobë prej 5 mijë eurosh ndaj Drejtorisë së Inspekcionit të Komunës së Prishtinës. Arsyeja e këtij ndëshkimi është moszbatimi i detyrimeve dhe përgjegjësive ligjore që kanë të bëjnë me menaxhimin e mbeturinave vëllimore dhe deponive të dheut. Sipas shpjegimeve të dhëna nga Pacolli, në deponinë e dheut të N.P.L. “Gjelbër” si dhe në terrenet përreth saj janë vërejtur mbeturina vëllimore të vendosura në mënyrë të parregullt jashtë hapësirës së caktuar të deponisë. “Pavarësisht njoftimeve të përsëritura, Drejtoria e Inspekcionit nuk ka ndërmarrë masat e nevojshme”, ka shkruar Pacolli në njoftimin e saj. Më tutje, ajo ka bërë thirrje që institucionet publike duhet të shërbejnë si model përmes veprimeve të tyre në ruajtjen e ambientit, duke shtuar se nuk do të tolerohet asnjë neglizhencë e përgjegjësive për parandalimin e ndotjes dhe trajtimin e duhur të mbeturinave. “Ligji vlen për të gjithë njësoj!”, ka theksuar në fund Pacolli.