Krueger dhe Siniakova përcaktojnë finalen e madhe të turneut WTA në Osaka

Tenistja amerikane Ashlyn Krueger dhe ajo çeke Katerina Siniakova do të jenë protagonistet e finales së madhe të turneut WTA që po zhvillohet në Osaka të Japonisë, duel ky i programuar për t'u luajtur të dielën. Krueger, e cila pozicionohet në vendin e 55-të të renditjes botërore, e siguroi biletën për në ndeshjen vendimtare pas një triumfi të vështirë ndaj bashkatdhetares së saj dhe njkohësisht kryesueses së listës së favoreve të turneut, Ann Li (e 25-ta në botë). Përballja mes tyre u mbyll me rezultatin 2:1 (6:4, 6:7, 6:3), pas një beteje të tensionuar që zgjati dy orë e 15 minuta. Në krahun tjetër, Siniakova, e cila mban vendin e 86-të në klasifikimin global, kaloi me sukses pengesën e tenistes britanike Katie Boulter, e cila mbante seed-in e tetë të turneut. Çekja e fitoi takimin 2:0 në sete (6:1, 6:4), duke e mbyllur çështjen e kualifikimit për vetëm 90 minuta lojë. Për 30-vjeçaren Siniakova, kjo do të jetë finalja e 11-të në karrierë në nivelin individual të WTA-së, ku do të synojë trofeun e saj të gjashtë. Kurorëzimin e fundit në këtë kategori ajo e pati regjistruar në muajin tetor të vitit 2023 në qytetin Nanchang të Kinës, ku pat mposhtur bashkëkombësen e saj Marie Bouzková. Në anën tjetër, Ashlyn Krueger ka një histori suksesi në këtë pistë, pasi është shpallur kampione e turneut të Osakës në edicionin e vitit 2023, kohë kur mposhti në finale kinezen Lin Zhu. Një fitore e mundshme këtë të diel do t'i siguronte asaj titullin e dytë të karrierës në turnetë e nivelit WTA.