Tensionohet situata para El Clasicos, Courtois lëshon deklarata të forta ndaj Barcelonës

Përballja e madhe mes Real Madridit dhe Barcelonës ka marrë një dinamikë të re, pasi portieri belg Thibaut Courtois ka ngritur temperatura para ndeshjes së shumëpritur në La Liga, duke drejtuar kritika të hapura ndaj qasjes së klubit katalanas ndaj rivalëve. Gjatë një interviste të dhënë për platformën DAZN, gardiani i “Los Blancos” ka vënë në pah dallimet në mentalitet mes dy gjigantëve spanjollë, duke theksuar se në kampin madrilen ekziston një kulturë respekti dhe vlerësimi për talentët e kundërshtarëve, diçka që sipas tij mungon shpesh te rivalët e tyre të Përjetshëm. Duke analizuar këtë rivalitet historik, Courtois u ndal te mënyra se si trajtohen futbollistët e skuadrës tjetër, duke u shprehur se klubi i tij nuk e ka asnjë lloj kompleksi për të pranuar vlerat e lojtarëve të Barcelonës. "El Clasico? Para së gjithash, ne nuk kemi absolutisht asnjë problem t’i përmendim emrat e lojtarëve të Barcelonës. Mendoj se pikërisht këtu dallojmë nga ata", u shpreh ndër të tjera portieri belg në deklaratën e tij. Sipas numrit një të portës së madrilenëve, garueshmëria në fushë nuk duhet të shërbejë kurrë si pengesë për të pranuar cilësitë dhe sukseset e individëve të tjerë, pavarësisht fanellës që ata veshin. "Nuk është problem për ne ta lavdërojmë dikë, edhe nëse është kundërshtari ynë. Ne i respektojmë lojtarët që bëjnë një punë të mirë, ndryshe nga pala tjetër", shtoi ai më tej. Këto komente të guximshme pritet t'i japin një ngarkesë edhe më të madhe emocionale këtij dueli klasik, i cili tradicionalisht mbart një tension të jashtëzakonshëm si në aspektin sportiv ashtu edhe në atë mediatik.