Zgjerimi i FSK-së: Mbi 3 mijë e 200 ushtarë të rinj i bashkohen forcës gjatë pesë viteve

Ministri i Mbrojtjes, Ejup Maqedonci, ka bërë të ditur se gjatë pesë viteve të fundit të qeverisjes, radhët e Forcës së Sigurisë së Kosovës (FSK) janë pasuruar me 3.220 trupa të rinj. Përmes një publikimi në rrjetet sociale, ai ka shpjeguar se ky angazhim ka sjellë një rritje të ndjeshme të kapaciteteve njerëzore, duke bërë që numri i përgjithshëm i pjesëtarëve të kësaj force të dyfishohet. Maqedonci ka garantuar se përkushtimi ndaj modernizimit dhe ngritjes profesionale të ushtrisë do të mbetet prioritet, me qëllim të ndërtimit të një strukture sa më të përgatitur dhe të aftë për garantimin e sigurisë dhe mbrojtjen e sovranitetit të Republikës së Kosovës. Në këtë linjë, ai ka konfirmuar se mbështetja financiare dhe strategjike për zhvillimin e mëtutjeshëm të FSK-së do të vijojë me intensitet të lartë, duke vënë theksin te ngritja e standardeve dhe zgjerimi i kapaciteteve operacionale.