Kryeministri Kurti pritje speciale për delegacionin e klubit shqiptar nga Zvicra, FC Dardania Basel

Kryeministri i vendit, Albin Kurti, ka zhvilluar një takim në Zyrën e Kryeministrit me përfaqësuesit e klubit FC Dardania Basel, një entitet sportiv i themeluar në vitin 1993 nga diaspora shqiptare në Zvicër. Gjatë këtij takimi, kreu i ekzekutivit ka vlerësuar lart kontributin e organizimeve sportive të mërgatës në edukimin e brezave të rinj. Ai vuri në pah se këto nisma ndihmojnë në kultivimin e disiplinës, punës në grup dhe vetëbesimit, duke shërbyer gjithashtu si urë lidhëse për ruajtjen e identitetit dhe origjinës shqiptare. “Kjo forcë shihet edhe në futboll, pasi që shumë futbollistë me prejardhje shqiptare kanë mbrojtur ngjyrat e Zvicrës e disa zgjodhën Shqipërinë”, ka shkruar Kurti përmes një postimi në rrjetin social Facebook. Më tej, ai vuri në dukje peshën e rëndësishme të komunitetit shqiptar në shtetin helvetik, ku sipas të dhënave të tij, jetojnë mbi 300 mijë qytetarë shqiptarë dhe zviceranë me rrënjë nga trojet tona. Në kuadër të kësaj vizite, skuadra e FC Dardania Basel, e cila simbolizon praninë dhe organizimin e mërgatës shqiptare në Zvicër, do të zhvillojë gjatë pasdites së sotme një ndeshje miqësore kundër ekipit të KFV Lipjan. Kryeministri Kurti e ka cilësuar këtë duel futbollistik si një mundësi të shkëlqyer për të ngushtuar edhe më tej marrëdhëniet mes diasporës dhe atdheut, duke shtuar se në këtë përballje “fiton para së gjithash lidhja jonë”.