Start i furishëm për Shqipërinë U-15, festival golash në Kupën e Botës FIFA në Azerbajxhan

Kombëtarja e Shqipërisë për grupmoshën U-15 ka regjistruar një paraqitje fantastike në ndeshjen e parë të "FIFA U-15 World Cup & Festival 2026", turne prestigjioz që po organizohet në tokën azerbajxhanase. Nën drejtimin e trajnerit Armand Dama, talentet e rinj kuqezinj kanë dominuar totalisht kundërshtarin, duke triumfuar me rezultatin e thellë 6-2 ndaj përfaqësueses së Ishujve Turks dhe Kaikos. Formacioni shqiptar e ka nisur sfidën me një ritëm mjaft agresiv, duke zhbllokuar shifrat që në minutën e 5-të falë një finalizimi të saktë nga Elio Mera. Vrulli i kuqezinjve nuk është ndalur me kaq. Në minutën e 12-të, Santiago Perkola ka dyfishuar epërsinë, ndërsa vetëm dymbëdhjetë sekonda më vonë ka shënuar sërish, duke çuar shifrat në 3-0. Epërsia e Shqipërisë është zgjeruar edhe më tej në minutën e 16-të, kur kapiteni Elez Elqeni ka realizuar golin e katërt. Më pas, rradha ka qenë për Denian Avdylajn, i cili në minutën e 29-të ka çuar topin në rrjetë, ndërsa festivalin e golave e ka kurorëzuar Matias Mehmeti në minutën e 32-të, duke u treguar i saktë nga pika e penalltisë. Edhe pse kundërshtari arriti të reagojë pjesërisht në vijim të lojës përmes golave të shënuar nga Wilsony Charles dhe Jwuan Exalus, Shqipëria menaxhoi me sukses situatën deri në vërshëllimën përfundimtare, duke arkivuar tri pikët e para në këtë aktivitet global të FIFA-s. Pas këtij starti të shkëlqyer, kuqezinjtë e vegjël do të kenë përpara sfida të reja në kuadër të fazës së grupeve, teksa më 25 tetor do të matin forcat radhazi me përfaqësueset e Mauritanisë dhe Ruandës.